O martes 24 de novembro alumnos de 2 e 3 da ESO visitaron a Ría do Burgo para iniciarse na observación de aves acuáticas.
No mes de novembro o alumnado de segundo curso e terceiro, acompañados polos profesores Matías Cuba, Eduardo Álvarez, Marta Penalonga e Patricia M. Leyenda, pasaron a Ponte do Pasaxe para iniciarse na observación das aves.
Xa no paseo marítimo de Fonteculler fixéronse tres paradas. Na primeira, comentouse como se facía un caderno de campo e explicouse o funcionamento das mareas. Na segunda, diferenciáronse as especies de gaivotas máis comúns que se atopan na ría. Na última, foi a mais intensa, posto que se indicou como se debuxaban as aves no campo, as características nas que hai que fixarse para a súa identificación. Coa axuda dun telescopio, púidose observar máis de dez especies distintas.
Algunhas das aves observadas foron: garza real, garceta común, cormorán grande, correlimos, andarrios, volvepedras, zarapitos e cisnes. Incluso tívose a posibilidade de descubrir unha rareza dentro da ría, a alca común.
O alumnado saliu moi satisfeito da experiencia e con gran cantidade de información para os cadernos de campo.
O día once de novembro os alumnos de primeiro de E.S.O e primeiro de Bacharelato realizaron unha visita á casa das ciencias e asistiron a unha sesión no Planetario nunha excursion organizada polos departamentos de Historia e Ciencias Naturais.
Acompañaron ós alumnos os profesores Carmen Porta, Milagros Rey e Antón García. Na Casa das Ciencias foron observando as exposicións que ali se atopan. Tamén puideron ver unha pelicula no planetario que -segundo comentan os alumnos- lles resultou moi interesante polo tema e polas dimensións da pantalla.
O día 25 de novembro celebrouse o día internacional contra a violencia sobre as mulleres. Marta Saavedra nos presenta esta breve e pero profunda reflexión.
O 22 de outubro de 2009, na Fabrica de Perillo, acudimos todo o alumnado de bacharelato e algún achegado de outros niveis de ESO. Alí encontrámonos cos compañeiros e compañeiras do Miraflores.
A pesar do intempestivo da hora, a obra de teatro que representaron actores profesionais impresionounos. Cachai é unha adaptación ao teatro do libro do filosofo Miguel Morey “Deseo de ser piel Roja”. O desigual reparto da riqueza no mundo, a perda da liberdade tras o golpe de estado, a loita por sair da miseria… foron asuntos abordados na obra. Ao remate convertidos en obxecto de discusión filosófica dende unha doble perspectiva: a) que visión somos quen de construir respecto do mundo no que vivimos. Vivimos anestesiados?; b) que compromiso moral asumimos respecto do que está a pasar. Que podemos facer para cambiar as cousas? Ese debate conducido polo profesor chileno Esteban Zamora foi rico en intervencións e contidos. Verdadeiramente xenerou en nós interés e tensión.
E chegou o remate do curso 2008-09. Chegou o martes 23, horas antes das sardiñadas e bailes na praia; horas antes de queimar os malos farios e renovar a vida no solsticio; horas antes de avaliar e poñer por escrito merecementos e carencias.
Son as 10 e 10 da mañá no salón de actos e xa está todo listo para Marián presente este acto de entrega de galardóns e premios no que sempre nos acompaña a música. E desfilan os gañadores da Olimpíada do Saber 2009; aplaudimos aos galardoados o 14 de maio en Pontevedra, no encontro de Axenda 21escolar de Galicia e recibimos o alento de Xan Neira para continuar con este proxecto de sostibilidade; recollen os seus diplomas os participantes no I Intercambio escolar con Bretaña e os gañadores do concurso de curtas Oleiros Solidario.
Finalmente entra en escena Jaime Miranda, adónanse do escenario os rapeiros de Pro-Visional e poñen termo a este acto final do curso acadêmico. Grazas a tod@s. Feliz verán.
O día vintedous de Maio celebrouse no noso Instituto o acto de graduación de segundo de Bacharelato. Con gran afluencia de público, e rigurosa etiqueta, alumnado, profesorado, familias e amigos asistiron ó concerto dos alumnos de música de primerio e segundo de Bacharelato que interpretaron pezas clásicas e modernas.
A continuación as palabras do alumno de segundo curso Santiago Conde Arias, de Isabel Romero Barciela mai de Manuel Pereiro Romero, e de Xoan Ignacio Taibo Arias en nome do profesorado. Pechou o acto o director do centro José López Couce.
Unha presentación sobre o alumnado de segundo de bacharelato e a entrega de diplomas foi o remate do acto. Posteriormente como xa é tradicional procedeuse á plantación da árbore e ao aperitivo preparado no propio centro. A continuación a cea de alumnos e profesores e a festa que sabemos foi moi animada.
Programa do Concerto
Alumnos de 1º de Bacharelato.
Canción india : Rimsky-Korsakov
Obertura da ópera “As vodas de Fígaro”: W.A. Mozart
Mar Capeans e parte do alumnado asistente. [Foto de La Voz de Galicia]Alumnos de física e química de 1º de Bacharelato asistiron o día 22 de maio no Centro Social dos Mallos ao Primeiro Encontro Científico CORUÑACERN. Esta actividade científica organizada polo IES Urbano Lugrís, pretende dar a coñecer o CERN, siglas empregadas para referirse á “Organización Europea para a Investigación Nuclear”, e tamén espertar vocacións científicas nos alumnos dos últimos cursos do ensino secundario.
Programa de Actividades
Conferencia : Susana Mataix. Que é o CERN?
Conferencia : Margarita Cimadevila. Science, Art & CERN.
Conferencia: Mar Capeáns. Experimento ATLAS: o soño acadado.
Obradoiro : Francisco Barradas. Visionado de neutrinos en Cámara de Néboa.
Festa en Mera. O 16 de maio de 2009 culmina o noso “ano Verne”, o ano académico da multiculturalidade e a viaxe sen fin. No escenario do auditorio García Márquez rendemos homenaxe ao escritor de Nantes que en 1873 publicou “A volta ao mundo en 80 días”. E facémolo rodeados de alumnas e alumnos, profesoras e profesores, nais e pais, familiares que desexan pasear polo mundo ao son da música e da palabra, participando nun espectáculo literario-musical que se adiantou no entroido e que agora cobra forma para a posteridade.
A nosa “Verníada” viña precedida da lectura dun libro sen par -Matías recomendóunolo, fíxonolo amar-, dun ensaio xeral en entroido -no que Marián e Jesús xa escolleran as pezas musicais que ían dar forma a esta representación-, dunha proxección dos mellores intres da versión cinematográfica, datada en 1956 -Nacho fixo a selección-, dunha conferencia na I Semana Intercultural, dunha entusiasta participación de profesorado no traballo interdisciplinar da obra -Isabel Aller, José Antonio Rodríguez, Antón, Isabel, Goretti, Warinca, Carlos-. Só quedaba que máis dun cento de alumnas e alumnos do IES Neira Vilas subisen ao escenario de Mera para poñer en práctica un traballo do que nos sentimos orgullosos.
E así foi. Durante oitenta minutos viaxamos por todo o mundo igual que Fogg o fixera en oitenta días. Miriam, absolutamente insuperable, presentou o espectáculo, introducíunos no argumento. E foron pasando lectores en diversos idiomas; Uxía, Sergio, Constance, Alberto, Bárbara, Dong, Sara, Joana, Bruno, André Luis e Vladimir foron ubicándonos nas paisaxes: Londres, Suez, Adén, Bombai, Hong-Kong, Yokohama, San Francisco, Oakland, Nova Iorque, a costa de Irlanda… Léronnos en francés, inglés, castelán, galego, portugués, chinés, xaponés, ruso. Puxéronnos ante a evidencia de que somos un centro educativo plural, e que nesa pluralidade nos gusta vernos reflectidos.
Quedan na retina as imaxes do alumnado disfrazado para axustarse estrictamente á representación: Héctor estaba glorioso co seu kilt escocés como se dun inmigrante de tal guisa en Nova Iorque se tratase; outros eran xudeus en Suez, vaqueiros no oeste, Alejo levaba un poncho sudamericano espectacular, Amanda era unha india do oeste moi ben caracterizada, había xoves galegas disfrazadas de orientais chinesas dun xeito excelente, Dong deunos un recital vocal cando pasamos por Hong-Kong.
Grazas a todas e todos. Podedes sentir contentos. Fixéstesnos amar a literatura, a música, a oratoria, o teatro, o espectáculo. Demostrastes que ler é gozar, que aprender non está en contra de disfrutar, que cando todos arrimamos o ombreiro as cousas merecen ser repetidas. Así que isto ten que ter continuidade. Porque o talento non debe quedar descansando na casa, hai que facelo público.
2º ESO B interpretando unha peza oriental en Suez
3º ESO A interpretando unha canción tradicional hebrea en Adén
1º Bacharelato interpreta “Canción india”, de Rimsky-Korsakov, en Mumbai
2º Bacharelato interpreta unha peza tradicional chinesa en Hong-Kong
3º ESO B interpreta unha nana no tren, camiño de Oakland
4º ESO B interpreta “O cóndor pasa”, en San Francisco
2º ESO A interpreta “A lenda da cidade sen nome”, camiño de Nova Iorque
Bacharelato e alumnado de 3ºESO interpretan danzas escocesas en Nova Iorque
2º Bacharelato interpretan danzas irlandesas, camiño de Irlanda
Como xa sabedes este curso está poñéndose en marcha no noso centro a axenda 21 escolar de Galicia. Trátase dun proxecto promovido pola consellería de medio ambiente para realizar nos centros programas orientados á educación no coidado medioambiental, no desenvolvemento sostible e no coidado da convivencia.
O IES Neira Vilas acadou o primeiro premio na reunión intercentros celebrada no pazo de congresos de Pontevedra o pasado xoves 14 de maio de 2009 co nome “O alumnado é protagonista”
24 alumnos do noso IES presentaron nese congreso dúas actividades:
Pola mañá o equipo de convivencia e mediación realizou unha ponencia que consistiu no visionado dun vídeo elaborado polo equipo e na realización dunha dinámica de grupo, con alumnos de outros centros participantes, na que se representaban os distintos momentos dunha mediación.
Pola tarde un grupo de alumnos de 2º ESO organizou un obradoiro de elaboración de carteis relacionados co coidado ao medio ambiente.
Serviron de modelo os carteis realizados no concurso que fixemos no IES, no que resultou gañadora a alumna de 3ºeso Stephanya Torres Esquivel.
Os alumnos/as de 4º da ESO, 1º de BAC e 2º de BAC visitarán o FORUM ORIENTA 2009 o día 13 de febreiro. O obxectivo desta actividade é que o alumnado adquira un maior coñecemento do ensino superior en Galicia. É unha actividade do Departamento de Orientación en colaboración coas Titorías.
DATA: 14-11-2008: VISITA A INDITEX
A visita a Inditex en Arteixo á que asistiron os alumnos de Economía de 1º e 2º de Bacharelato consistíu nun percorrido polos distintos departamentos: Diseño, Tendas piloto, fabricación e distribución…..acompañado das explicacións necesarias por parte de persoal da empresa
CAMPAÑA PARA A PREVENCIÓN DA DROGADICCIÓN:
Durante a semana do 3 ao 7 de NOVEMBRO todo o alumnado da ESO recibiu unhas charlas informativas e talleres para tratar a prevención da drogadicción.
Esta actividade foi organizada conxuntamente pola dirección do centro e o concello de Oleiros.
DATA: 5-11-2008: FORMACIóN DE USUARIOS DE BIBLIOTECA
O pasado día 5 de Novembro os alumnos de 4º da ESO asistiron a unha visita de Formación de usuarios de biblioteca que tivo lugar na biblioteca do parque Europa de A Coruña.
DATA: 28-10-2008. ACTIVIDADE: DESAFÍO PARA NOVOS EMPRENDEDORES.
Un grupo de alumnos de economía de 1º de Bacharelato está a participar nun xogo da Escola de negocios de Caixanova. Para informarlles sobre o xogo e aclarar dúbidas , trasladóuse ao centro un membro do equipo de Play: desafío para novos emprendedores.
Esperamos que a charla fose de gran utilidade e que gañen o xogo
¡ Boa sorte, rapaces!
SAMAGOSTÍN
O luns 10 de novembro celebraremos no IES Neira Vilas o “SAMAGOSTÍN”: MAGOSTO + SAMAÍN
Instituto de Ensino Secundario Plurilingue Xosé Neira Vilas. Perillo (Oleiros)
![Mar Capeans e parte do alumnado asistente. [Foto de La Voz de Galicia]](http://www.iesneiravilas.es/arquivo/wp-content/uploads/2014/10/h23c6f1.jpg)
