Arquivo da categoría: Curso 2008-2009

Entrevista ó profesor de filosofía, Fernándo Vidal Meijón

Ética e cidadanía, os comezos da filosofía

Entrevista feita por Antía López Mosteiro e Sara Sequeiros Fernández [4ºA ESO]

O profesor Fernando Vidal Meijón
O profesor Fernando Vidal Meijón

¿En que consiste a educación á cidadanía?A educación para a cidadanía e unha materia nova que se introduciu no sistema educativo despois da ultima lei do PSOE, e supostamente pretende cubrir a eses niveis de primeiro ou segundo ciclo de secundaria -xa que hai algunhas comunidades autónomas en España nas que esta materia se imparte en terceiro da ESO- unha serie de contidos que non estaban cubertos, contidos como que son os dereitos humanos, a constitución española, a democracia, cales son os recursos que nos da a democracia para poder exercer como cidadáns, etc.
¿E, dende o seu punto de vista, é bo estudala?Non é nin bo nin malo, estaría mellor se iso se exercese. Se nos Institutos se aplicase máis.
¿Para que serve?Serve para coñecer mellor as cousas, como cando mercas un aparello electrónico e lees as instrucións dun aparello que acabas de mercar. É unha maneira de coñecer eses recursos que a sociedade che ofrece para poder ser cidadán libre e poder facer o que queres facer.
¿Que é a ética?A ética é unha reflexión racional sobre a conduta, coa idea de intentar pensar a mellor maneira de ser felices, si é que se pode pensar iso e si é que hai algún recurso racional que nos permita tomar decisión nunha dirección ou noutra.
¿Para que serve a educación ética-cívica?A verdade é que é pouco tempo ó que se lle adica porque é unha hora semanal, pero debería de servir para facer un exercicio practico de manexo de criterios racionais para reflexionar sobre o que facemos. Cuestionarnos o que facemos, fago isto, por que?
O profesor Vidal con Sara e Antía
O profesor Vidal con Sara e Antía

Antes relacionábase a ética coa relixión, ¿Hoxe en día, que relación teñen?A ética e a relixión van collidas da man. Porque a relixión tamén pretende establecer criterios para vivir. A diferenza é que a ética pretende que ti reflexiones como ser feliz e como vivir sen deus.
¿Qué se estuda na ética?Estúdase elementos necesarios para poder construír elementos racionais sobre a conduta, diferentes elementos que constitúen a moralidade humana (responsabilidade, liberdade…) algún tipo de propostas para ser feliz que fixeron filósofos ao longo da historia. Reflexións sobre os dereitos humanos, feminismo, pacifismo, ecoloxismos…
O obxectivo é poder reflexionar sobre o que fas dende as claves dos distintos puntos de vista.
¿Esta materia esta encamiñada cara a filosofía?Si, porque de algunha maneira si es quen de establecer un discurso racional sobre o que fas, estarás preparado para discutir sobre outros temas máis abstractos como que é a verdade e qué é a mentira e moitos outros temas…
Moitas gracias

Remate de Curso

E chegou o remate do curso 2008-09. Chegou o martes 23, horas antes das sardiñadas e bailes na praia; horas antes de queimar os malos farios e renovar a vida no solsticio; horas antes de avaliar e poñer por escrito merecementos e carencias.
Son as 10 e 10 da mañá no salón de actos e xa está todo listo para Marián presente este acto de entrega de galardóns e premios no que sempre nos acompaña a música. E desfilan os gañadores da Olimpíada do Saber 2009; aplaudimos aos galardoados o 14 de maio en Pontevedra, no encontro de Axenda 21escolar de Galicia e recibimos o alento de Xan Neira para continuar con este proxecto de sostibilidade; recollen os seus diplomas os participantes no I Intercambio escolar con Bretaña e os gañadores do concurso de curtas Oleiros Solidario.
Finalmente entra en escena Jaime Miranda, adónanse do escenario os rapeiros de Pro-Visional e poñen termo a este acto final do curso acadêmico. Grazas a tod@s. Feliz verán.

Graduación 2º BACH. Curso 2008-2009

Promoción 2008-2009
Promoción 2008-2009

O día vintedous de Maio celebrouse no noso Instituto o acto de graduación de segundo de Bacharelato. Con gran afluencia de público, e rigurosa etiqueta, alumnado, profesorado, familias e amigos asistiron ó concerto dos alumnos de música de primerio e segundo de Bacharelato que interpretaron pezas clásicas e modernas.
A continuación as palabras do alumno de segundo curso Santiago Conde Arias, de Isabel Romero Barciela mai de Manuel Pereiro Romero, e de Xoan Ignacio Taibo Arias en nome do profesorado. Pechou o acto o director do centro José López Couce.
Unha presentación sobre o alumnado de segundo de bacharelato e a entrega de diplomas foi o remate do acto. Posteriormente como xa é tradicional procedeuse á plantación da árbore e ao aperitivo preparado no propio centro. A continuación a cea de alumnos e profesores e a festa que sabemos foi moi animada.

Programa do Concerto

Alumnos de 1º de Bacharelato.

  1. Canción india : Rimsky-Korsakov
  2. Obertura da ópera “As vodas de Fígaro”: W.A. Mozart

Alumnos de 2º de Bacharelato

  1. Habanera: M. Girao
  2. Marcha dos granadeiros: R. Schuman
  3. Gaudeamus igitur: Popular
  4. Devil’s dream: Popular irlandesa
  5. Ragtime: S. Jopplin

Pode baixar unha selección de fotos do acto.

Primeiro Encontro Científico CORUÑACERN

Mar Capeans e parte do alumnado asistente. [Foto de La Voz de Galicia]
Mar Capeans e parte do alumnado asistente. [Foto de La Voz de Galicia]
Alumnos de física e química de 1º de Bacharelato asistiron o día 22 de maio no Centro Social dos Mallos ao Primeiro Encontro Científico CORUÑACERN. Esta actividade científica organizada polo IES Urbano Lugrís, pretende dar a coñecer o CERN, siglas empregadas para referirse á “Organización Europea para a Investigación Nuclear”, e tamén espertar vocacións científicas nos alumnos dos últimos cursos do ensino secundario.

Programa de Actividades

  1. Conferencia : Susana Mataix. Que é o CERN?
  2. Conferencia : Margarita Cimadevila. Science, Art & CERN.
  3. Conferencia: Mar Capeáns. Experimento ATLAS: o soño acadado.
  4. Obradoiro : Francisco Barradas. Visionado de neutrinos en Cámara de Néboa.

A noticia en “La Voz de Galicia

Verníada

Todos no escenario Festa en Mera. O 16 de maio de 2009 culmina o noso “ano Verne”, o ano académico da multiculturalidade e a viaxe sen fin. No escenario do auditorio García Márquez rendemos homenaxe ao escritor de Nantes que en 1873 publicou “A volta ao mundo en 80 días”. E facémolo rodeados de alumnas e alumnos, profesoras e profesores, nais e pais, familiares que desexan pasear polo mundo ao son da música e da palabra, participando nun espectáculo literario-musical que se adiantou no entroido e que agora cobra forma para a posteridade.
A nosa “Verníada” viña precedida da lectura dun libro sen par -Matías recomendóunolo, fíxonolo amar-, dun ensaio xeral en entroido -no que Marián e Jesús xa escolleran as pezas musicais que ían dar forma a esta representación-, dunha proxección dos mellores intres da versión cinematográfica, datada en 1956 -Nacho fixo a selección-, dunha conferencia na I Semana Intercultural, dunha entusiasta participación de profesorado no traballo interdisciplinar da obra -Isabel Aller, José Antonio Rodríguez, Antón, Isabel, Goretti, Warinca, Carlos-. Só quedaba que máis dun cento de alumnas e alumnos do IES Neira Vilas subisen ao escenario de Mera para poñer en práctica un traballo do que nos sentimos orgullosos.
E así foi. Durante oitenta minutos viaxamos por todo o mundo igual que Fogg o fixera en oitenta días. Miriam, absolutamente insuperable, presentou o espectáculo, introducíunos no argumento. E foron pasando lectores en diversos idiomas; Uxía, Sergio, Constance, Alberto, Bárbara, Dong, Sara, Joana, Bruno, André Luis e Vladimir foron ubicándonos nas paisaxes: Londres, Suez, Adén, Bombai, Hong-Kong, Yokohama, San Francisco, Oakland, Nova Iorque, a costa de Irlanda… Léronnos en francés, inglés, castelán, galego, portugués, chinés, xaponés, ruso. Puxéronnos ante a evidencia de que somos un centro educativo plural, e que nesa pluralidade nos gusta vernos reflectidos.
Quedan na retina as imaxes do alumnado disfrazado para axustarse estrictamente á representación: Héctor estaba glorioso co seu kilt escocés como se dun inmigrante de tal guisa en Nova Iorque se tratase; outros eran xudeus en Suez, vaqueiros no oeste, Alejo levaba un poncho sudamericano espectacular, Amanda era unha india do oeste moi ben caracterizada, había xoves galegas disfrazadas de orientais chinesas dun xeito excelente, Dong deunos un recital vocal cando pasamos por Hong-Kong.
Grazas a todas e todos. Podedes sentir contentos. Fixéstesnos amar a literatura, a música, a oratoria, o teatro, o espectáculo. Demostrastes que ler é gozar, que aprender non está en contra de disfrutar, que cando todos arrimamos o ombreiro as cousas merecen ser repetidas. Así que isto ten que ter continuidade. Porque o talento non debe quedar descansando na casa, hai que facelo público.

Axenda 21 escolar de Galicia.

Premio
Premio

Como xa sabedes este curso está poñéndose en marcha no noso centro a axenda 21 escolar de Galicia. Trátase dun proxecto promovido pola consellería de medio ambiente para realizar nos centros programas orientados á educación no coidado medioambiental, no desenvolvemento sostible e no coidado da convivencia.
O IES Neira Vilas acadou o primeiro premio na reunión intercentros celebrada no pazo de congresos de Pontevedra o pasado xoves 14 de maio de 2009 co nome “O alumnado é protagonista”
24 alumnos do noso IES presentaron nese congreso dúas actividades:
Pola mañá o equipo de convivencia e mediación realizou unha ponencia que consistiu no visionado dun vídeo elaborado polo equipo e na realización dunha dinámica de grupo, con alumnos de outros centros participantes, na que se representaban os distintos momentos dunha mediación.
Pola tarde un grupo de alumnos de 2º ESO organizou un obradoiro de elaboración de carteis relacionados co coidado ao medio ambiente.
Serviron de modelo os carteis realizados no concurso que fixemos no IES, no que resultou gañadora a alumna de 3ºeso Stephanya Torres Esquivel.

Outras Actividades. Curso 2008-2009

FORUM ORIENTA 2009

Os alumnos/as de 4º da ESO, 1º de BAC e 2º de BAC visitarán o FORUM ORIENTA 2009 o día 13 de febreiro. O obxectivo desta actividade é que o alumnado adquira un maior coñecemento do ensino superior en Galicia. É unha actividade do Departamento de Orientación en colaboración coas Titorías.

DATA: 14-11-2008: VISITA A INDITEX

A visita a Inditex en Arteixo á que asistiron os alumnos de Economía de 1º e 2º de Bacharelato consistíu nun percorrido polos distintos departamentos: Diseño, Tendas piloto, fabricación e distribución…..acompañado das explicacións necesarias por parte de persoal da empresa

CAMPAÑA PARA A PREVENCIÓN DA DROGADICCIÓN:

Durante a semana do 3 ao 7 de NOVEMBRO todo o alumnado da ESO recibiu unhas charlas informativas e talleres para tratar a prevención da drogadicción.
Esta actividade foi organizada conxuntamente pola dirección do centro e o concello de Oleiros.

DATA: 5-11-2008: FORMACIóN DE USUARIOS DE BIBLIOTECA

O pasado día 5 de Novembro os alumnos de 4º da ESO asistiron a unha visita de Formación de usuarios de biblioteca que tivo lugar na biblioteca do parque Europa de A Coruña.

DATA: 28-10-2008. ACTIVIDADE: DESAFÍO PARA NOVOS EMPRENDEDORES.

Un grupo de alumnos de economía de 1º de Bacharelato está a participar nun xogo da Escola de negocios de Caixanova. Para informarlles sobre o xogo e aclarar dúbidas , trasladóuse ao centro un membro do equipo de Play: desafío para novos emprendedores.
Esperamos que a charla fose de gran utilidade e que gañen o xogo
¡ Boa sorte, rapaces!

SAMAGOSTÍN

O luns 10 de novembro celebraremos no IES Neira Vilas o “SAMAGOSTÍN”: MAGOSTO + SAMAÍN
 

Semana Intercultural

Tríptico informativoEra marzo, amencendo abril. Tempo de aprendizaxe e lecer, tempo de recepción e exposición. Mentres unha exposición sobre a muller innovadora na ciencia se exhibía no corredor inferior, mentres alumnado de diversos cursos participaban nun intercambio cun centro bretón, alumnado e profesorado do IES Neira Vilas debullaba e asimilaba os variados coñecementos e visitas que no centro se teceron na Semana Intercultural 2009.
Do 30 de marzo ao 3 de abril tiveron lugar toda unha serie de actividades que integraron letras e ciencias, que nos acompañaron nun paseo pola cultura e o entretenemento. Falouse de trasplantes, da loita da muller polos seus dereitos, de aforro enerxético, de experiencias científicas, da meteoroloxía nas obras de Verne, do surf, do decrecemento, da astronomía, de Darwin… Comemos sopas de diversos lugares do mundo, tan variados como a procedencia do noso alumnado, percorremos boa parte dese mundo na proxección clásica de “A volta ao mundo en oitenta días” (1956), aprendemos da nosa contorna con saídas para concienciarnos sobre a necesidade de reciclar. Todo un rebumbio cultural que non queremos deixar de repetir cada ano.
Por iso ten que quedar na nosa lembranza este momento, porque a colaboración do profesorado foi excepcional, porque a participación do alumnado foi exquisita -e non só do noso, tamén tivemos visita dos nosos veciños de Bastiagueiro, do IES María Casares-, porque a colaboración desinteresada dos diversos poñentes foi un agasallo.
É tempo de agradecer a todo o mundo o seu esforzo, sen esquecerse de ninguén: alumnado, profesorado, concelleira, membros do CEFORE, conserxes, limpadoras. Isto non fixo máis que comezar. O ano vindeiro, MÁIS!!!
 

Intercambio Escolar

París
París

Do 24 de marzo ao 4 de abril de 2009 tivo lugar o 1º Échange co centro francés de Nôtre Dame Le Ménimur (Vannes – Bretaña – Francia), no que participaron 22 alumnas/os de 2º, 3º, 4º ESO e 1º de Bacharelato. O intercambio tivo lugar acompañando a outras/os tantas/os alumnas/os do IES Puga Ramón, que se intercambiaban con alumnado da mesma localidade, mais do centro de St François Xavier. Ás cinco da tarde do 25 de marzo, o autobús que nos levaba chegou á capela de St Gwenn, onde xoves practicantes de rugby agardan ao transporte respectivo xogando con balóns oblongos. E, mentres tanto, 44 estudantes descenderon un tanto atemorizados, inquedos, nervosos, ante a chegada inminente dos seus “correspondentes” bretóns. Moitas historias individuais arrancaron nese intre, sempre para lembrar.
O xoves 26 visitamos o Museo Arqueolóxico de Vannes, que expresamente abría as súas portas ás nove da mañá para que poidésemos observar, no primeiro piso, restos arqueolóxicos excavados no Morbihan, que delatan os cambios culturais da prehistoria nestes lugares; á saída, Julien contounosos grosso modo a historia de Vannes enlazada á de Bretaña (as orixes galorromanas de Darioritum, as primeiras murallas para defenderse das invasións xermánicas, o retroceso do mar ata o nivel do actual porto, a creación das murallas baixomedievais, o traslado temporal do parlamento bretón desde Rennes durante o reinado do Roi Soleil, a chegada do ferrocarril no século XIX, a liberación polos norteamericanos da vila en agosto de 1944,…) e levounos coñecer os modelos de casas góticas do século XV, unha casa renacentista do XVI, a catedral, as portas das murallas, os vellos lavadeiros reconstruidos no XIX,… Unha mañá de paseo histórico pola vila abríu o camiño a comer cedo -horario europeo, estabamos en Francia- e ser recibidos ás dúas da tarde na casa do concello, onde aos agasallos se engade unha bebida co verre de l’amitié tras a proxección dun video que incidía na recuperación do interese polo mar por parte da cidade que nos acolle. O programa do día incluíu acudir ás clases do lycée e contactar coa vida académica francesa.
Carnac
Carnac

O venres 27 fixemos unha excursión cara ao Norte, pasando por Dinan, Saint-Malo e Mont Saint-Michel, xa na Normandía. Dinan ten un casco histórico medieval ben conservado, que deixamos para chegar a mediodía á desembocadura do Rance, a unha cidade bombardeada en 1944 e en grande parte reconstruída -a cidade fortificada de Saint-Malo-, exposta aos ventos e chea de eventos náuticos, patria pequena de Chateaubriand e punto de partida do explorador de Canadá Jacques Cartier. A choiva impediunos case saír do autobús para comer, mais respetou a nosa chegada ao Mont St-Michel, coa enorme agulla sobre a que se colga a imaxe do arcanxo inundando a visión do horizonte; as pingas de auga salgada baten contra as fortificacións da abadía, na que atopamos o refuxio austero da basílica, o claustro, o refectorio, as criptas e o resto de arquitecturas da Merveille. Finalmente regresamos de noite a Vannes, con máis experiencias na mente.
O fin de semana en familia deixou liberdade para as experiencias individuais. Mais somos conscientes de que parte do alumnado ten visitado o mercado matinal na place des Lices e se tivo familiarizado coas costas recurtadas do golfo de Morbihan.
Na mañá fría do luns 30 de marzo, o autobús levounos cara ao Oeste. Os grandes menhires de Kermario, en Carnac, refulxían nas fiadas de varios km de pedras fitas de grandes dimensións alineadas de leste a oeste que descobren o percorrido astronómico do astro sol en diversas épocas do ano. Despois mercamos biscuits, liqueurs e souvenirs para as nosas familias españolas na Trinitaine, antes de chegar a pasear á cidade vella de Quimper. Kemper -en bretón “confluencia”-, ao borde do Odet e do Steïr, é a antiga Aquilonia, ben resgardada entre unhas murallas case totalmente destruídas, da que poucas casas anteriores ao século XVIII permanecen -houbo un grande incendio daquela, e despois moitas esculturas da catedral de Saint-Corentin tamén foron queimadas en tempos da revolución francesa-, é unha cidade agradable de pasear, na que tivemos ocasión de atoparnos coa “Visión despois do sermón” de Gauguin e outras alegorías bretonas -como a de Jean Brunet, que data de 1908- que nos lembran a importancia dos megalitos, a relixión e as cofias do pays bigouden na recreación destas terras. Grande tarde de sol, horas de crêpes e cidre, tarde de visita á catedral de Saint-Corentin, tan marcada pola desviación do eixo, evidente entre o coro e a nave.
Dinan
Dinan

O martes 31 de marzo estivemos en clase. Á tarde houbo unha homenaxe a Esther Iglesias, a falecida profesora do IES Puga Ramón -co que cooperamos, viaxamos e participamos no échange- que habitualmente viña cos seus alumnos a St François. E Adrián estivo alí para poñer “Negra sombra” no seu saxofón.
A partir de mércores quedáronnos días de lecer en París. Camiñamos polos Campos Elíseos, navegamos sobre as augas do Sena entre lusco e fusco, coñecemos a cidade na súa esencia (Nôtre Dame, Invalides, Campo de Marte, Arco de Triunfo,…), subimos á Tour Eiffel, ascendemos a Montmartre e divertímonos en Eurodisney. Grazas pola vosa participación. Foi un entusiasmo contar cun grupo de alumnas e alumnos estupendo.
Podedes ler e ver máis na crónica bretona do profesor Xosé Antón.
Tamén pode descargar un archivo [ 3,7 Mb] con máis fotos do intercambio.

Obradoiro de danza

Menos 1: Un mundo no que os lados opostos non están tan separados, no que o cambio dun estado a outro sucede de forma continua, onde a risa se convirte en algo triste e a caída nun momento elegante.
Menos 1: Un mundo no que os lados opostos non están tan separados, no que o cambio dun estado a outro sucede de forma continua, onde a risa se convirte en algo triste e a caída nun momento elegante.

O día 31 de marzo con motivo da semana cultural o departamento de educación física levou a cabo un obradoiro de danza contemporánea impartido pola coreográfa Rut Balbis, da Compañia Pisando Ovos. A actividade estivo pensada para alumnos de 3º e 4º de ESO, en horario de 8.30h a 10.10h. En primeiro lugar a coreógrafa impartiu una pequena clase no ximnasio, posteriormente representou a coreografia “Menos 1” no corredor no andar inferior. A actividade foi moi ben acollida, os alumnos tiveron ocasión de preguntarlle a bailarina todas aquelas curiosidades e inquietudes relacionadas con esta disciplina artística.