Agustín Fernández Paz

Agustín Fernández Paz

Preparación previa

Uns días antes do prazo fixado para esta actividade, que tivo lugar na biblioteca Rialeda de Perillo 0 14 de febreiro, desenvolvemos na nosa biblioteca unha “contenda literaria” na cal os propios participantes, alumnos e alumnas de 4° de ESO, dirixiron o xogo a base de preguntas e respostas sobre o autor e arredor dos seus libros, principalmente Aire negro.

Obxectivos:

• Aproximarnos á vida e á obra de Fernández Paz.
• Profundizar na lectura da novela.
• Aprender a valorar aquilo que posúe relevancia no libro.
• Descubrir o que pasa inadvertido e, porén, desenvolve un papel importante.

Realización:

A profesora pediulles aos alumnos e alumnas participantes que escribisen tres preguntas, que só podía coñecer quen as escribise. Formáronse dous equipos co mesmo número de integrantes, e entre eles elixiron un portavoz para cada agrupamento. Entón concedéuselles un tempo para que os que formaban parte do mesmo grupo se comunicasen as preguntas e para que as seleccionasen. Esta posta en común realizouse sen intervención da coordinadora. Terminada a preparación, comeza o xogo do seguinte xeito:

• Un xogador ou xogadora do equipo A preguntou a un/unha do equipo B. Se este/esta contesta e acerta, a coordinadora anota dous puntos a favor do equipo B. Se descoñece a resposta da pregunta, pide axuda ao seu grupo. Neste caso a coordinadora do xogo anota un só punto ao equipo B.
• O turno correspóndelle agora ao alumno ou alumna do equipo B interrogado/-a previamente, para formular unha pregunta ao mesmo xogador ou xogadora que lle preguntou a el/ela.
• A coordinadora anota o resultado, igualmente. A animación discorre deste xeito ata que todos os rapaces e rapazas dun e do outro equipo tiveron a ocasión de preguntar e de ser preguntados.
• Cando rematan os dous equipos, indícase a puntuación que conseguiu cada un. Entre outras cousas, a puntuación final pode expresar unha mellor lectura do libro por parte do grupo gañador, ou unha mellor habilidade para preguntar o máis difícil e profundo do libro en cuestión.

Tempo necesario:

Unha hora, aínda que este tempo pode variar dependendo da capacidade do alumnado e da habilidade que desenvolva durante o xogo.

Presentación, realizada pola alumna de 4° de ESO, Rocío Saavedra:

Agustín Fernández Paz

Agustín Fernández Paz naceu en Vilalba (Lugo). Estudou en Barcelona a carreira de Perito Industrial Mecánico, pero a súa vocación levouno cara ao maxisterio. Na actualidade é profesor de Lingua e Literatura Galegas no IES Os Rosais 2, de Vigo.

Leva escritos 37 libros de fición, entre os cales podemos citar As flores radioactivas (Premio Merlín 1989), Trece anos de Branca (Premio Edebé de Literatura xuvenil 1994), Cartas de inverno (Premio Rañolas de Literatura Infantil 1995), Amor dos quince anos, Marilyn ( ), Aire negro (Premio de Literatura Protagonista Jove 2001. IBBY Honour List 2002.White Ravens 2001), ou ¡Que medo, mamá Raquel!, texto que a Editorial Xerais vén de publicar. Cómpre sinalarmos, ademais, que o papel do noso escritor vai acadando, dende o galego, unha dimensión internacional xa que se publicou a primeira edición en coreano de O meu nome é Skywalker (Premio O Barco de Vapor 2003).

Resumo da conferencia pronunciada

O creador de Vilalba desvelounos as raíces do seu amor polos mundos de ficción: os relatos de medo que escoitaba a carón do lume, nun tempo en que aínda non chegara a televisión; os libros de aventuras que había na pequena biblioteca de seu pai, onde Jules Verne convivía con Edgar Allan Poe ou Wenceslao Fernández Flórez; os seriais que escoitaba pola radio; os cómics que lía, nos cales descubriu a súa fascinación polos heroes de papel, e as inesquecibles películas de cinema que tanto o atraían, que vai homenaxear en Amor dos quince anos, Marilyn, un libro escrito no centenario do nacemento do cine.