Todolos artigos de: xefatura

Bachibac, Curso 2025-2026, Curso Actual, Intercambios escolares

INTERCAMBIO DE BACHIBAC 1 CON VANNES

O pase de diapositivas require JavaScript.

Do 6 ao 13 de febreiro o alumnado de 1º de Bacharelato que cursa o programa Bachibac viaxou á localidade bretona de Vannes para levar a cabo a primeira parte do intercambio co lycée Saint François-Xavier. Ao longo desa semana os/as nosos/as alumnos/as asistiron ás clases no centro francés, acompañando aos seus correspondentes, e viviron acollidos polas familias destes. Asemade, gozaron dunha visita guiada á historia e o patrimonio de Vannes, organizada polo instituto SFX, e realizaron dúas excursións coas que puideron achegarse un pouco máis ao coñecemento da lingua, da cultura e da historia francesas: unha a Nantes, na que coñeceron o castelo dos Duques de Bretaña, a catedral, a arquitectura decimonónica e os formidables enxeños tecnolóxicos das Machines de l’Île, e outra a Rennes, capital da Bretaña, onde puideron descubrir desde a catedral e o casco vello ata o Parc du Thabor e a magnífica piscina municipal de estilo Art déco.

A comunidade do Neira quere agradecer a sempre amable e entusiasta acollida brindada polo lycée Saint François-Xavier e, en particular, pola profesora Elodie Quidu e o alumnado participante nesta bela experiencia e que agardamos recibir no noso centro a comezos do curso que vén. Merci beaucoup et à bientôt!
Alumnado, Curso 2025-2026, Curso Actual, Departamento de Francés, Departamento de Inglés

CONCESIÓN DE AXUDAS PARA A REALIZACIÓN DE PROBAS DE ACREDITACIÓN DA COMPETENCIA EN LINGUAS ESTRANXEIRAS

A Dirección Xeral de Ordenación e Innovación Educativa publicou a resolución definitiva das axudas a centros públicos dependentes da Consellería de Cultura, Educación, Formación profesional e Universidades para a realización de probas de acreditación da competencia en linguas estranxeiras para o alumnado que curse estudos de 4º ESO e 2º Bach durante o curso 2025/2026.

O noso instituto resultou beneficiario dunha achega total de 6.000€ destinados a financiar, a razón de 100€ por alumno/a, as probas de acreditación da competencia lingüística en Inglés e Francés por parte do alumnado de 4º ESO e 2º Bacharelato que presentou o seu compromiso para examinarse no prazo correspondente.

Malia a contía adxudicada e de acordo coa convocatoria que regula estas axudas, dado que a dotación económica outorgada é insuficiente para cubrir todas as demandas do alumnado interesado, é preciso aplicar, xunto aos criterios de distribución establecidos na propia resolución, os criterios de selección informados no Claustro do 25 de outubro de 2022 e aprobados no Consello escolar desa mesma data. Ditos criterios establecen que, en caso de que as axudas concedidas sexan insuficientes para todo o alumnado que entregou o compromiso de presentación ás probas de acreditación lingüística, ditas axudas concederanse en primeiro lugar ao alumnado que o curso anterior acadara maior nota na materia do idioma ao que se quere presentar e, en caso de empate, concederanse ao alumnado con maior nota media no curso anterior. O venres 16 de xaneiro levouse a cabo no centro unha reunión da Xefatura de estudos co alumnado interesado para informar deste particular e realizar a selección correspondente.

A información completa sobre estas axudas pode consultarse no seguinte enlace: https://www.edu.xunta.gal/portal/node/48667

Con respecto ás probas, no caso do francés as datas dos exames do DELF Scolaire B1 e B2 e do DALF C1 están publicadas na web da Alliance Française: https://afcoruna.com/examenes-oficiales/. A comezos de febreiro, o alumnado recibirá toda a información necesaria para matricularse en ditos exames. No caso do inglés, o alumnado será informado proximamente polo Departamento correspondente do procedemento de matrícula e das datas das probas.

Admisión de alumnado, Alumnado, Curso 2025-2026, Curso Actual, Secretaría

RESERVA, ADMISIÓN E MATRÍCULA CURSO 2026-27

PRAZOS, DOCUMENTACIÓN, INFORMACIÓN

  • SOLICITUDE DE RESERVA DE PRAZA DO ALUMNADO DO CENTRO ADSCRITO (CEIP RAMÓN Mª DEL VALLE-INCLÁN) PARA 1º ESO:

– Prazo de solicitude de reserva: Do 15 de xaneiro ao 4 de febreiro.

– Procedemento: Presentación da solicitude de reserva ED550A no centro de orixe (pódese descargar neste enlace: https://www.edu.xunta.gal/admisionalumnado/), ben de xeito manual, ben a través da Sede electrónica coa Chave 365 ou con certificado dixital.

– Asignación de prazas e publicación de listaxes de alumnado admitido sen fase de baremo e de prazas vacantes no taboleiro do IES e na aplicación admisionalumnado: 22 de febreiro. No caso de que non houbera praza para todas as solicitudes de reserva, publicarase tal circunstancia no centro e todo o alumnado deberá presentar necesariamente a solicitude de admisión ordinaria coa documentación que se indica neste documento a efectos de realizar a baremación (enlace ao documento).

– Publicación de postos escolares vacantes: antes do 1 de marzo.

  • SOLICITUDE DE ADMISIÓN ORDINARIA DO ALUMNADO DE CENTROS NON ADSCRITOS PARA CALQUERA CURSO:

– Prazo de solicitude de admisión ordinaria: Do 1 ao 20 de marzo.

– Procedemento: Presentación da solicitude de admisión (ED550B (Anexo II e Anexo IIbis) (pódese descargar neste enlace: https://www.edu.xunta.gal/admisionalumnado/), ben de xeito manual no IES Plurilingüe Xosé Neira Vilas, ben a través da Sede electrónica coa Chave 365 ou con certificado dixital.

– Documentación necesaria: coa solicitude de admisión deberá presentarse a documentación que se indica no seguinte documento.

– Publicación das listaxes provisionais de persoas admitidas e non admitidas no taboleiro do IES e na aplicación admisionalumnado: 25 de abril.

– Publicación das listaxes definitivas de persoas admitidas e non admitidas no taboleiro do IES e na aplicación admisionalumnado: 15 de maio.

  • MATRÍCULA NO CENTRO DE TODO O ALUMNADO DE ESO E BACHARELATO ADMITIDO NOS PROCESOS DE RESERVA E/OU ADMISIÓN ORDINARIA

– Prazo de matrícula: Do 26 de xuño ao 3 de xullo, segundo as quendas por cursos que se establecerán no calendario de matrícula que será publicado na web do instituto no seu momento.

– Instrucións para a matrícula: nas datas de matrícula estará disponible na web do instituto toda a información sobre o procedemento de matrícula, documentación necesaria e lugar e horario para formalizala.

INFORMACIÓN IMPORTANTE

  1. As persoas solicitantes poderán presentar solicitude de admisión en prazo pedindo ata seis (6) centros por orde de preferencia e alegando os criterios de admisión/baremación que pretendan que se lles valoren. Esta solicitude deberá ser dirixida ao centro solicitado en primeiro lugar. Despois de presentar unha solicitude de admisión, para renunciar a ela deberá facerse expresamente, indicándoo no recadro correspondente da nova solicitude que deberá presentarse.
  2. O alumnado que teña prioridade para continuar estudos nun centro de adscrición pode exercer o seu dereito á reserva de praza presentando solicitude de reserva no centro adscrito, isto é, no que está matriculado nese momento, e identificará o centro de adscrición que solicita.
  3. En todo caso, a solicitude de reserva ou de admisión é única para cada alumno/a e ten carácter vinculante. A súa presentación implica que son certos os datos indicados nela. A existencia dunha solicitude de admisión presentada en prazo sen renunciar expresamente á anterior e, asimesmo, a existencia dunha solicitude de admisión sen ter renunciado á praza reservada a 28 de febreiro (este incluído) poderán ser causa de perda do dereito a participar no procedemento de admisión.
  4. O IES Plurilingüe Xosé Neira Vilas conta cunha liña de transporte escolar e cafetería escolar en horario de 08:30 a 13:30.
  5. A admisión e matriculación do alumnado no IES Plurilingüe Xosé Neira Vilas implicará o respecto do seu proxecto educativo.
  6. Para calquera consulta sobre o procedemento poden acudir ao portal da Consellería de Cultura, Educación, Formación profesional e Universidades e á aplicación admisionalumnado (https://www.edu.xunta.gal/admisionalumnado), así como á normativa de referencia indicada a continuación.

NORMATIVA DE REFERENCIA

O procedemento de reserva, admisión e matrícula réxese pola seguinte normativa de referencia:

  1. Decreto 13/2022, do 3 de febreiro, polo que se regula a admisión de alumnado en centros docentes sostidos con fondos públicos que imparten ensinanzas de segundo ciclo de educación infantil, educación primaria, de educación secundaria obrigatoria e de bacharelato reguladas na Lei orgánica 2/2006, do 3 de maio, de educación[DOG do 11 de febreiro de 2022].
  2. Orde do 21 de outubro de 2022 pola que se desenvolve o Decreto 13/2022, do 3 de febreiro, e se regula o procedemento de admisión do alumnado nos centros docentes sostidos con fondos públicos que imparten ensinanzas de segundo ciclo de educación infantil, de educación primaria, de educación secundaria obrigatoria e de bacharelato reguladas na Lei orgánica 2/2006, do 3 de maio, de educación (códigos de procedemento ED550A, ED550B e ED550C)[DOG 8 de novembro de 2022].
  3. Instrucións da Dirección Xeral de centros e recursos humanos sobre o desenvolvemento do proceso de admisión de alumnado en centros docentes sostidos con fondos públicos para o curso académico 2026-2027.
Alumnado, Curso 2025-2026, Curso Actual

NORABOA, ISSOUF E MBEMBA!!

O Neira Vilas ten o orgullo enorme de informar de que os nosos ex-alumnos Issouf Kone e Mbemba Drammeh resultaron merecedores de sendos Premios de educación secundaria obrigatoria ao esforzo e á superación persoal correspondentes ao curso 2024-2025, outorgados pola Consellería de Educación, Ciencia, Universidades e Formación profesional e dos que só se concederon un total de vinte para toda Galicia. A comunidade educativa do Neira Vilas celebra este éxito persoal e académico de dous alumnos excelentes que constitúen un exemplo de superación, aprendizaxe e compañeirismo para todos/as nós e, asemade, deséxalles aos agraciados que este sexa o comezo dun feliz porvir. Noraboa!!

Biblioteca, Curso 2025-2026, Curso Actual

OUTRO CURSO MÁIS DE CLUB DE LECTURA!

O noso centro vén de renovar un curso máis a súa participación no programa “Club de lectura” cunha dotación económica de 780€ para a adquisición de libros e a realización de actividades previstas no marco do noso club de lectura, “O faiado de Balbino”, coordinado por Jesús E. Pérez, profesor de Lingua castelá.
Este curso a oferta de grupos de lectura, que leva funcionando desde mediados de outubro, é moi ampla e inclúe: “Elas contan” (Relatos escritos por mulleres), “A ghata chemistry” (Narrativa policiaca), “Utopía” (Historia), “Comiqueirxs” (Banda deseñada), “Historias fantásticas da mitoloxía” (Mitoloxía), “Bambalinerxs” (Club e obradoiro de teatro), “Teatromáticas” (Teatro e Matemáticas a escea), “Xs Lusíadxs” (literatura portuguesa) e “Osxs Dubidosxs” (Filosofía).
Toda a información sobre esta convocatoria pódese consultar neste enlace: https://www.edu.xunta.gal/portal/node/48626

Actividades, Alumnado, Bachibac, Curso 2025-2026, Curso Actual

PARTICIPACIÓN NO PROGRAMA EDUEXCHANGES

Un curso máis o noso centro resultou seleccionado para participar no Programa EduExchanges de intercambio presencial de alumnado con centros educativos doutros países durante o curso 2025-2026, segundo se recolle no portal da Consellería de Educación, Ciencia, Universidades e Formación Profesional: https://www.edu.xunta.gal/portal/node/48665
A axuda económica concedida ao abeiro deste programa, enmarcado na Estratexia Galega de Linguas Estranxeiras Edulingüe 2030, destinarase a financiar o intercambio do alumnado de 1º de Bacharelato que cursa o programa Bachibac co Lycée Saint François-Xavier de Vannes (Bretaña, Francia). Dito intercambio terá lugar do 6 ao 13 de febreiro.
Proximamente as familias do alumnado implicado serán convocadas a unha reunión no centro para informar de todas as cuestións relativas á organización do intercambio.
Curso 2025-2026, Curso Actual, Erasmus+, Intercambios escolares

REMATE DO INTERCAMBIO ERASMUS+

O xoves 20 de novembro foi o último día da acollida do alumnado francés do intercambio Erasmus+ no noso centro. Con ese motivo tivemos o pracer de recibir a visita de Stéphanie Wojtyna e Sophie Flament Drapeau, profesoras do Lycée Henri Martin, de Saint-Quentin, no que estudan as dúas alumnas Mélissa e Chloe do Erasmus. As docentes estiveron acompañadas de Sonia Vázquez e Patricia Ares, responsables da Asesoría de programas europeos da Consellería. Foi un pracer compartir con elas o proxecto plurilingüe e Bachibac do noso instituto, así como valorar os resultados do intercambio Erasmus+, que resultou un éxito tanto académico como persoal para o alumnado participante.

Moitas grazas a Alba, Eva e Héctor e ás súas familias pola acollida á rapazada francesa! Moitas grazas a Mélissa, Chloe e Marceau, cos que foi un pracer compartir este mes! E moitas grazas a toda a comunidade educativa do Neira pola súa implicación e colaboración neste proxecto!
Bachibac, Curso 2025-2026, Curso Actual

VISITA DO AGREGADO DE COOPERACIÓN PARA O FRANCÉS E DA DIRECTORA DA ALLIANCE FRANÇAISE DA CORUÑA

No marco dos proxectos e accións relacionados co estudo do francés e da francofonía no noso instituto, este mércores 19 de novembro tivemos o enorme pracer de recibir no centro a Valérian Bayo-Rahona, agregado de cooperación para o francés na Embaixada francesa en Madrid e coordinador das Alianzas francesas de España, xunto con Sabrina Bermúdez, directora da Alliance française da Coruña. O obxectivo da visita era coñecer o proxecto plurilingüe do noso instituto, membro do selo “Label FrancÉducation” (https://www.labelfranceducation.fr/) e o único de toda Galicia no que se imparte o programa Bachibac, así como reforzar a cooperación lingüística arredor do francés e a colaboración coa Alliance française a través da presentación de múltiples proxectos nos que esperamos participar proximamente co noso alumnado francófono.

Bachibac, Curso 2025-2026, Curso Actual, Erasmus+

MESA REDONDA “O SISTEMA EDUCATIVO EN ESPAÑA E FRANCIA”

Este mércores 19 de novembro o alumnado de 1º de Bachibac participou nunha mesa redonda desenvolvida polos tres compañeiros/as que estiveron de intercambio en Francia a comezos de curso no marco do Consorcio Galemundo Acreditación Erasmus Escolar, así como polos seus tres correspondants franceses, que se atopan actualmente en inmersión no noso centro. O obxectivo era achegar ao alumnado Bachibac a realidade e características do sistema educativo francés, en canto á súa organización, materias e contidos que se estudan, sistemas de avaliación, procedemento de acceso á universidade…, e comparalo co funcionamento do sistema educativo galego. A actividade resultou moi proveitosa e permitiu ao alumnado de Bachibac participar da experiencia do intercambio Erasmus+ dos compañeiros/as e coñecer un pouco mellor a realidade educativa francesa. Moitas grazas a todos pola vosa participación e, en especial, a Marceau e a Mélissa!

O proxecto “Galemundo Acreditación Erasmus Escolar” está cofinanciado polo programa Erasmus+ da Unión Europea. O contido desta publicación é responsabilidade exclusiva do IES Plurilingüe Xosé Neira Vilas e nin a Comisión Europea, nin o Servicio Español para la Internacionalización de la Educación (SEPIE) son responsables do uso que poida facerse da información aquí difundida.