Arquivo da categoría: Alumnado

Alumnado, Curso 2024-2025, Curso Actual

CALENDARIO DE FINAL DE CURSO DE 2º BACHARELATO

Segundo o calendario escolar publicado ao comezo do curso, o 15 de maio é o último día lectivo de 2º de Bacharelato. A partir do luns 19 de maio comezarán as clases de reforzo e de preparación das PAU ordinarias.
O mesmo día 15, ás 10:30 h., terá lugar no Salón de actos unha reunión de todo o alumnado de 2º de Bacharelato coa Xefatura de estudos, onde se lle transmitirá toda a información e documentación necesaria para a solicitude do título de Bacharelato e a matrícula nas PAU. O prazo de matrícula na convocatoria ordinaria das PAU é o 16 e o 19 de maio. Toda a información detallada pode consultarse neste documento.
A entrega de boletíns terá lugar no centro o venres 16 de maio ás 10:30 h. na aula de referencia de cada grupo. Ese mesmo día comeza o período de revisión e reclamación ás cualificacións finais, de acordo co calendario e a normativa que se recollen a continuación. O alumnado ou as familias que queiran solicitar a revisión ou reclamación ás cualificacións finais dispón da documentación necesaria na Secretaría do centro.
Admisión de alumnado, Alumnado, Curso 2024-2025, Curso Actual

ADMISIÓN ORDINARIA DE ALUMNADO PARA O CURSO 2025-2026: PUBLICACIÓN DAS LISTAXES DEFINITVAS

O xoves 15 de maio publicáronse as listaxes definitivas do alumnado admitido para o curso 2025-2026. As familias poden consultar ditas listaxes presencialmente no taboleiro de anuncios do centro ou por vía electrónica, con certificado dixital ou Chave365, a través da aplicación informática admisionalumnado.
As persoas interesadas poderán interpor recurso de alzada a ditas listaxes ante a persoa titular da xefatura territorial no prazo dun mes contado a partir do día seguinte ao da súa publicación. A resolución da persoa titular da xefatura territorial porá fin á vía administrativa e contra esta cabe interpor recurso potestativo de reposición ou recurso contencioso-administrativo.
MATRÍCULA NO CENTRO: O prazo de matrícula será do 27 de xuño ao 4 de xullo, segundo as quendas por cursos que se establecerán no calendario de matrícula que será publicado na web do instituto no seu momento. Nas datas de matrícula estará dispoñible na web do instituto toda a información sobre o procedemento de matrícula, impresos, documentación necesaria e lugar e horario para formalizala.
Alumnado, Curso 2024-2025, Curso Actual, Departamento de Francés

REALIZACIÓN DOS EXAMES DO DELF SCOLAIRE

Nos vindeiros días terán lugar os exames do Delf Scolaire para a acreditación da competencia lingüística en francés, realizados pola Alliance Française da Coruña e aos que se presentan un total de 35 alumnos/as do noso centro.
Como xa se lles informou directamente aos/ás interesados/as a través dunha circular e ás súas familias a través de Abalar, as probas escritas terán lugar, ao igual que en anos anteriores, no IES Eusebio da Guarda da Coruña o mércores 7 de maio, de 17:00 a 18:55 h. para o nivel B1 e o xoves 8 de maio, de 17:00 a 18:40 h. para o nivel A2 e de 17:00 a 19:30 h. para o nivel B2. O alumnado deberá achegarse ao centro á hora correspondente polos seus medios (acceso polas portas que dan ao paseo marítimo e que fan esquina coa rúa Modesta Goicouría), levando o seu DNI, número de candidato e bolígrafo azul ou negro non borrable.
Pola súa parte, as probas orais terán lugar no noso instituto ao longo do martes 13 de maio, na hora en que cada alumno/a está convocado/a individualmente e da que xa foi convenientemente informado/a.
Moita sorte a todos/as!
Alumnado, Bolsas e axudas, Curso 2024-2025, Curso Actual

CONVOCATORIA DAS AXUDAS DO MINISTERIO PARA O ALUMNADO CON NECESIDADES ESPECÍFICAS DE APOIO EDUCATIVO

O 25 de abril publicouse no BOE a resolución da Secretaría de Estado de Educación pola que se convocan as axudas para o alumnado con necesidades específicas de apoio educativo para o curso 2025-2026. O prazo para solicitalas está aberto desde o 30 de abril ata o 11 de setembro de 2025. Toda a información sobre estas axudas e o procedemento para solicitalas pódese consultar no seguinte enlace: https://www.becaseducacion.gob.es/becas-y-ayudas.html, tamén accesible desde o taboleiro de anuncios da web do noso centro.

Admisión de alumnado, Alumnado, Curso 2024-2025, Curso Actual

ADMISIÓN ORDINARIA DE ALUMNADO PARA O CURSO 2025-2026: PUBLICACIÓN DAS LISTAXES PROVISIONAIS

O venres 25 de abril publicáronse as listaxes provisionais do alumnado admitido para o curso 2025-2026. As familias poden consultar ditas listaxes presencialmente no taboleiro de anuncios do centro ou por vía electrónica, con certificado dixital ou Chave365, a través da aplicación informática admisionalumnado.
Perante estas listaxes provisionais poderase formular reclamación no prazo de 5 días hábiles contados a partir do seguinte ao da súa publicación ante o Consello Escolar. Estas reclamacións entenderanse estimadas ou desestimadas coa publicación da listaxe definitiva.
A listaxe definitiva será publicada o 15 de maio.
Alumnado, Bachibac, Curso 2024-2025, Curso Actual

CHARLA DE LAURA OMIL VOZMEDIANO SOBRE O BACHIBAC E OS ESTUDOS UNIVERSITARIOS EN FRANCIA

No marco das actividades desenvolvidas polo IES Plurilingüe Xosé Neira Vilas con motivo da celebración do 10º Aniversario da implantación do Bachibac no centro, o xoves 10 de abril tivemos o enorme pracer de contar coa presenza de Laura Omil Vozmediano, alumna egresada do programa Bachibac que actualmente cursa o segundo ano de Linguas estranxeiras aplicadas aos negocios na Université de Lille. Na charla, titulada “Do francés ao Bachibac, do Bachibac a Lille” e dirixida ao alumnado de 1º e 2º de Bachibac e ao alumnado de 4º ESO que cursa Xeografía e Historia en francés, Laura compartiu a súa experiencia persoal, aportando numerosas e valiosas reflexións e consellos para o alumnado francófono do noso instituto. A comunidade educativa do Neira quere agradecer a Laura a súa xenerosidade ao compartir o seu tempo e vivenzas con nós, así como felicitala polos seus logros persoais e académicos que, sen dúbida, seguirán crecendo nos vindeiros anos.

Alumnado, Curso 2024-2025, Curso Actual

CONVOCATORIA DE 3 MOBILIDADES ERASMUS+ EN FRANCIA PARA O CURSO 2025/2026

O IES Plurilingüe Xosé Neira Vilas é socio do consorcio de mobilidade Galemundo Acreditación Erasmus+ no Sector da Educación Escolar coordinado pola Consellería de Educación, Ciencia, Universidades e Formación Profesional. O consorcio desenvolverá actividades de mobilidade con fondos Erasmus+ a través dun proxecto acreditado durante o curso 2025-2026.
Ao noso centro correspóndenlle 3 mobilidades en Francia, que se desenvolverán a comezos do curso 2025-2026 e están destinadas a 3 alumnos/as actualmente matriculados en 4º ESO e que no curso que vén vaian facer 1º Bacharelato.
Publícase, polo tanto, a convocatoria correspondente a estas mobilidades, na que se detalla toda a información sobre cando se desenvolverán, con que características, que alumnado destinatario, que criterios de selección do mesmo… e se detallan os prazos para que as persoas interesadas poidan solicitala na Secretaría do centro, presentando a documentación que se publica a continuación e se indica na convocatoria.
– Documentación necesaria para facer a solicitude:
  1. Solicitude de participación.
  2. Condicións de participación.
  3. Declaración datos de saúde.
  4. Autorización uso de imaxes.
Asemade, convócase a aquelas persoas interesadas nestas mobilidades a unha reunión informativa que terá lugar no centro o xoves 24 de abril, ás 18:00 h.
O prazo para solicitar participar nestas mobilidades remata o luns, 28 de abril, ás 14:00 h.
Alumnado, Curso 2024-2025, Curso Actual

PUBLICACIÓN DA RESOLUCIÓN DEFINITIVA DAS BOLSAS DO MINISTERIO PARA ESTUDOS POSTOBRIGATORIOS PARA O CURSO 2024-2025

O 26 de marzo de 2025 publicouse na web do Ministerio de Educación, Formación profesional e Deportes a resolución definitiva das bolsas para estudos postobrigatorios correspondentes ao curso 2024-2025: https://www.educacionfpydeportes.gob.es/servicios-al-ciudadano/catalogo/general/05/050130/ficha/050130-2024.html. Contra esta resolución pode presentarse recurso de reposición (ata o 28 de abril), de acordo co procedemento indicado nesa mesma páxina web.

 

 

Alumnado, Curso 2024-2025, Curso Actual, Departamento de Bioloxía e Xeoloxía

A vida a través do microscopio

O alumnado de Bioloxía, Xeoloxía e Ciencias Ambientais de 1º de Bach realizou unha exposición coas fotografías que tomaron durante as prácticas de laboratorio desta materia. Nela, pódense descubrir detalles do mundo microscópico, dende tecidos animais e vexetais, ata un organismo completo.
Podedes achegarvos para descubrir os detalles de cada fotografía!
Alumnado, Bolsas e axudas, Curso 2024-2025, Curso Actual

CONVOCATORIA DE BOLSAS DE EDUCACIÓN DO MINISTERIO PARA O CURSO 2025/26

Dende o 24 de marzo ás 08:00 h. ata o 14 de maio ás 15:00 h. está aberto o prazo para solicitar as bolsas do Ministerio de Educación, Formación Profesional e Deportes para estudos postobrigatorios para o curso 2025/26, tanto para Bacharelato e FP, como para estudos universitarios (Grao e Máster).
Toda a información pode consultarse no seguinte enderezo: https://www.becaseducacion.gob.es/becas-y-ayudas.html