Todolos artigos de: vicedireccion

Actividades, Curso 2024-2025, Curso Actual, Departamento de Lingua Galega, Equipo de Dinamización da Lingua Galega

Letras Galegas 2025 coa A.F. Aturuxo

O pase de diapositivas require JavaScript.

O día 15 comezou a celebración das Letras Galegas no IES Neira Vilas. E non podía haber mellor maneira de empezar que saíndo ao torreiro coa Agrupación Folklórica Aturuxo!

Os grupos de terceiro da ESO asistiron, na Fábrica, a unha xornada ben especial con aquelas persoas que forman parte de Aturuxo. Desde a emoción de quen acompañou as Pandereteiras de Mens polo mundo e desde o espazo do querer pola nosa tradición oral de cantadoras e tocadoras, coñecemos un chisquiño máis a historia das mulleres que nos transmitiron un tesouro. Pero non só! Tamén puxemos en práctica o aprendido e subimos ao palco para sacar punto e ata houbo quen se animou a facer soar as ferreñas!

Grazas ben sentidas por esta oportunidade de gozar cos maneos e as muiñeiras, A.F. Aturuxo! Foi unha xornada chea de ledicia e emoción!

Actividades, Curso 2024-2025, Curso Actual, Departamento de Lingua Galega, Equipo de Dinamización da Lingua Galega

Correlingua 2025

O pasado 6 de maio os grupos de segundo da ESO participaron na XXV edición do Correlingua. Desta forma, o IES Xosé Neira Vilas participou nesta xuntanza dos centros educativos da Coruña baixo o lema a mocidade activa por unha lingua digna e percorreron o paseo marítimo desde o estadio de Riazor ata a Torre de Hércules.

Isabel Risco e Pauliña animaron coas súas intervencións esta xornada tan especial da que gozou o noso alumnado.

 

Actividades, Curso 2024-2025, Curso Actual, Departamento de Xeografía e Historia

ARREDOR DA MEMORIA HISTÓRICA: VISITA A MEIRÁS E CERÁMICAS DO CASTRO

Os días 7 e 11 de abril o alumnado de 4º ESO e o de 1º de Bacharelato que cursa a modalidade de Ciencias Sociais e Humanidades visitaron o Pazo de Meirás e o complexo de Cerámicas do Castro-Sargadelos de Sada, nunha saída multidisciplinar organizada polos Departamentos de Xeografía e Historia, Lingua galega e Lingua castelá e polo Equipo de Dinamización da lingua galega. Con esta excursión culminaron as diversas actividades e lecturas que se levan desenvolvendo no centro desde o comezo de curso para achegar a este alumnado ao coñecemento da historia máis recente do noso país e dos retos que a memoria histórica segue a plantexar na actualidade.
Moitas grazas a todo o alumnado polo seu interese e moitas grazas tamén ao profesorado participante nesta iniciativa, moi especialmente ao noso compañeiro Manuel Pérez Lorenzo, gran coñecedor da historia da contorna de Sada e Oleiros e guía de excepción no Pazo de Meirás. Moitas grazas, asemade, ao persoal da Fábrica Castro-Sargadelos de Sada pola acollida que nos brindaron nos días que seguiron á conmemoración da figura de Isaac Díaz Pardo, a quen precisamente se lle adicou este ano o Día das Artes Galegas 2025, celebrado o 1 de abril.

O pase de diapositivas require JavaScript.

Actividades, Curso 2024-2025, Curso Actual, Departamento de Lingua Galega, Departamento de Xeografía e Historia, Equipo de Dinamización da Lingua Galega

Encontro con Eva Mejuto

O pasado 9 de abril, os grupos de 4º da ESO continuaron co proxecto de recuperación da memoria e participaron, na Fábrica de Perillo, nun encontro coa autora da novela A ladroa da biblioteca de Meirás.

Eva Mejuto fixo un percorrido polas personaxes da novela, quen ou que lle deu a clave e a inspiración para a súa creación e desvendou a importancia dos lugares como Meirás nos acontecementos da historia.

A parte da documentación previa a escribir causou bastante impresión, leva moito traballo e poucas veces se fala dela, así como as escollas do multiperspectivismo. Tamén foi moi interesante saber que a presentación do libro do noso profe de historia, Manuel, tivo moito que ver no nacemento desta narración.

Ao final da sesión, Eva Mejuto asinou os exemplares da obra e o alumnado trouxo de volta unha lembranza inesquecible consigo.

Actividades, Curso 2024-2025, Curso Actual, Departamento de Lingua Galega, Equipo de Dinamización da Lingua Galega

Festival Boca Chea con Celso Fernández Sanmartín

Grazas ao Servizo de Normalización do Concello de Oleiros, os grupos de terceiro da ESO puideron asistir a unha contada feita por Celso Fernández Sanmartín no salón de actos do noso centro.

Comezou o contador expoñendo as orixes do seu interés pola literatura de transmisión oral, para, a continuación, destacar a importancia dos nosos contos populares en todo o mundo. Seguimos as aventuras compostelanas sen perder de vista os consellos da avoa do autro. E todo isto entre conto e conto e cando nos quixemos decatar… tocou o timbre! Soubo ben a pouco e quedamos con ganas de saber máis así que faremos o que nos recomendou Celso: aproveitaremos o que aprendemos en Sopa de pedra para viaxar moi, moi, moi lonxe!

Actividades, Curso 2024-2025, Curso Actual, Departamento de Lingua Galega, Equipo de Dinamización da Lingua Galega

Espectáculo multimedia de Yolanda Castaño

Neste obradoiro poético en que as letras encontran acubillo entre as imaxes, música, recitado ou referencias a mundos diversos, o alumnado de segundo de bacharelato gozou de aprender desde o achegamento emocional e sensitivo.

O camiño entre os versos, que xa coñeciamos das aulas, converteuse en real e andamos entre poemas de A segunda lingua, O libro da egoísta, Punver ou Materia como quen acompaña a literatura desde o sentir máis intenso.

O coloquio con Yolanda Castaño no final da sesión foi, ademais, moi enriquecedor e reflexionamos coa poeta de temas tan interesantes como a creación poética ou a situación actual de Sargadelos.

Sen querer marchar, chegou o tempo de regresar ao instituto, pero levamos con nós todas as ganas de mergullar nos poemarios de Yolanda Castaño e continuar esta viaxe poética.

Actividades, Curso 2024-2025, Curso Actual, Departamento de Lingua Galega, Equipo de Dinamización da Lingua Galega

De coplas e versos

De coplas e versos. A poesía no cancioneiro popular galego é desas actividades que cambian a cor do día xa que Apiario, na palabra de Antía Otero, converteu a mañá nunha copla que uniu o pasado, o presente e o futuro.

O alumnado de primeiro de bacharelato, en dúas sesións inesquecibles, participou na proposta de achegarse á riqueza da literatura de tradición oral desde diferentes recursos e músicas, pero o máis sorprendente foi a creación colectiva e o recital en que puxeron en común as propias creacións. E o certo é que a escrita está de parabéns con esta rapazada que supón o futuro das Letras Galegas!

Actividades, Curso 2024-2025, Curso Actual, Departamento de Lingua Galega, Equipo de Dinamización da Lingua Galega

A poesía non morde

O alumnado de segundo da ESO asistiu ao espectáculo poético de Yolanda Castaño A poesía non morde e nel gozamos dun universo poético inzado de imaxes que nos engaiolaron.

Poesía do fútbol, dos caramelos, do verán e dos bos momentos compartidos foron os leitmotiv desta xuntanza, nas Torres de Santa Cruz. Impresionounos aprender como o cotiá tamén pode ser poetizable! E, sen dúbida, habemos de darlle bo uso a estas novas ferramentas poéticas que traemos connosco de volta para o instituto!

 

Actividades, Curso 2024-2025, Curso Actual, Departamento de Lingua Galega, Equipo de Dinamización da Lingua Galega

Superheroes 1º ESO

O grupos de primeiro da ESO, achegáronse este venres 28 de marzo, á Biblioteca Rialeda para participar na actividade Superheroes, a nova mitoloxía a cargo do ilustrador Miguel Cuba.

A rapazada gozou das aventuras e das narracións fantásticas e, ademais, explorou cales son as relacións que teñen estas personaxes coas das mitoloxías clásicas como a grega ou a exipcia. Foi realmente sorprendente descubrir que as bandas deseñadas, como as que lemos hoxe en día, teñen tantas conexións co pasado!

Con todas estas ideas a rebulir nas cabezas non foi difícil poñelas en práctica e, antes de regresar ao instituto, afiamos os lapis e as cores e… creamos as nosas propias superheroínas e superheroes!

O pase de diapositivas require JavaScript.

Bachibac, Curso 2024-2025, Curso Actual, Intercambios escolares

INTERCAMBIO DE BACHIBAC 1 CON VANNES

Do 7 ao 14 de marzo o alumnado de Bachibac de 1º de Bacharelato viaxou á localidade bretona de Vannes para levar a cabo a primeira parte do intercambio co lycée Saint François-Xavier, co que temos establecida unha sólida relación nos últimos catro cursos. Ao longo desa semana, os/as nosos/as alumnos/as asistiron ás clases no centro francés, acompañando aos seus correspondentes, e viviron acollidos polas familias destes.

O pase de diapositivas require JavaScript.

Asemade, gozaron dunha visita guiada á historia e o patrimonio de Vannes, organizada polo instituto SFX, e realizaron dúas excursións coas que puideron achegarse un pouco máis ao coñecemento da lingua, da cultura e da historia francesas: unha a Nantes, na que coñeceron o castelo dos Duques de Bretaña, a catedral, a arquitectura decimonónica e os formidables enxeños tecnolóxicos das Machines de l’Île inspirados na obra de Jules Verne, e outra a Lorient, onde puideron descubrir desde a Citadelle moderna de Port-Louis, enclave fundamental do comercio de Indias en tempos de Luis XIV, ata as construcións que formaban a gran base de submarinos alemáns da Segunda Guerra Mundial, integrada no chamado “Muro atlántico”.
A comunidade do Neira quere agradecer a sempre amable e entusiasta acollida brindada polo lycée Saint François-Xavier e, en particular, pola profesora Elodie Quidu e o alumnado participante nesta bela experiencia e que agardamos recibir no noso centro a comezos do curso que vén. Merci beaucoup et à bientôt!