O sábado 25 de maio as e os integrantes do club de lectura de banda deseñada e manga do noso centro visitaron a exposición ExpOtaku en Coruña. Alí puideron coñecer de primeira man moitas novidades sobre o mundo do manga e o anime, participar en diferentes obradoiros e xogos e disfrutar de numerosas actividades que poñen un broche de ouro ás sesións de lecturas e reflexións compartidas ao longo do curso por estes grandes lectores e lectoras.
Arquivo da categoría: Biblioteca
PARTICIPACIÓN NA XVI XORNADA DE CLUBS DE LECTURA
O pasado 14 de maio o noso centro participou na XVI Xornada de Clubs de Lectura, organizada por Bibliotecas Escolares de Galicia, cunha representante de excepción, a profesora Eli Ríos, que presentou a súa experiencia á fronte, por segundo ano consecutivo, do club de lectura adicado á banda deseñada e ao manga que ten moita popularidade entre o alumnado e é un viveiro de aprendizaxes e lecturas compartidas. Asemade, este curso Eli Ríos é a coordinadora do club de lectura do instituto, “O Faiado de Balbino”, que naceu o curso pasado e que, grazas ao bo quefacer do equipo de biblioteca e do profesorado que puxo en marcha diferentes grupos de lectura temáticos, continúa a súa singradura con gran éxito.
Día do libro na Biblioteca
O pasado 23 de abril a Biblioteca do IES Neira Vilas adicou o Día do Libro ao alumnado que leu máis libros no que levamos de curso. E por ser lector@s asidu@s recibiron un vale para mercar un libro. Noraboa aos premiados que foron: Sofía Arruñada Prego, Issouf Kone, Valentino Lobatón Pinedo e Sofía Valentina Ospino.
RENOVACIÓN DO CLUB DE LECTURA “O FAIADO DE BALBINO”
O noso centro vén de renovar un curso máis a súa participación no programa “Club de lectura” cunha dotación económica de 1.100 € para a adquisición de libros e a realización das actividades previstas no marco do noso club, “O faiado de Balbino”, coordinado por Eli Ríos.
Este curso a oferta de grupos de lectura é moi ampla e inclúe: “Xs Lusíadas. Club de lectura en portugués”, “O andel da castrexa”, “Elas contan”, “Bululú”, “Historias fantásticas da mitoloxía”, “Cousas”, “Lectura emocional a través de cancións” e “Cantarolas. Club de lectura de familias”. Todos eles están organizados por profesorado dos departamentos de Grego, Lingua castelá e literatura, Lingua galega e literatura, Orientación e Xeografía e Historia.
Toda a información sobre esta convocatoria pódese consultar neste enlace: https://www.edu.xunta.gal/portal/node/41999
RENOVACIÓN DO PLAMBE E PARTICIPACIÓN NA XORNADA DE BIBLIOTECAS ESCOLARES 2023
O noso centro vén de renovar un curso máis a súa participación no Plan de Mellora de Bibliotecas Escolares, que nesta ocasión supón a concesión dunha dotación económica de 1.070 € para adquisición de libros para a nosa biblioteca. Toda a información sobre esta convocatoria pódese consultar aquí: https://www.edu.xunta.gal/portal/node/40171.
Asemade, a pertenza ao Plambe implica formar parte dunha ampla rede de bibliotecas escolares de toda Galicia que colabora en iniciativas comúns, conta co respaldo da Asesoría de Bibliotecas e permite participar en diversas actividades e xornadas formativas, como a Xornada de Bibliotecas Escolares 2023, que tivo lugar este sábado, 18 de novembro, en Santiago de Compostela e á que asistiu a coordinadora da nosa biblioteca, a profesora Vanessa Liñares Vázquez.
“O faiado de Balbino” despídese por este curso
O club de lectura bota o peche despois dun curso cheo de boas lecturas e experiencias compartidas. Os sete grupos de lectura que o compuxeron (Banda deseñada en galego, Mitoloxía clásica, Portugués, Teatro, Xeografía e Historia, Diversidade e Familias), coordinados por David Amboage, Mercedes López-Mayán, Guadalupe Pardo, Elisabet Ríos e Noé Vázquez, contaron coa participación dun total de 104 lectores e lectoras, repartidos entre alumnado de todos os cursos e familias, e leron 25 títulos diferentes, en galego, castelán, portugués e francés. Ademais das sesións de posta en común e discusión sobre as lecturas, puideron disfrutar de múltiples actividades (obradoiros de escrita, encontro con autores/as, roteiros literarios ou as visitas á libraría Berbiriana con motivo do Día do Libro e a ExpOtaku).
Moitísimas grazas a todos/as os/as participantes polo interese e ilusión amosados!
CELEBRACIÓN DO DÍA DO LIBRO
Este curso celebrouse o Día Internacional do Libro por todo o alto! Ao longo de toda a semana puidéronse coñecer as numerosas recomendacións literarias feitas polo alumnado, profesorado e PAS do centro expostas nun mural confeccionado polo equipo de biblioteca no andar baixo.
E o domingo, 23 de abril, pola mañá, tres representantes do noso club de lectura “O faiado de Balbino”, Inés Rucci, Óscar López e Sergio Domínguez, leron diversos fragmentos dalgúns dos seus libros favoritos na actividade organizada pola Librería Berbiriana da Coruña. As obras escollidas foron, respectivamente, “La historia interminable” de Michael Ende, “Non penses nun elefante rosa” de Antía Yáñez e “El bestario de Axlin”, primeiro tomo da triloxía “Guardianes de la ciudadela” de Laura Gallego. Moitas grazas a todxs pola participación!
A BIBLIOTECA RENOVA O SEU ESPAZO WEB
A información sobre a biblioteca dispoñible na páxina web do instituto vén de ser renovada e actualizada polo seu equipo. Desde esta semana poden consultarse nela as normas de uso da biblioteca e información detallada sobre a súa historia, os servizos que presta,os fondos que posúe, o enlace ao catálogo en liña e as numerosas actividades que desenvolve.
DOAZÓN DE LIBROS EN FRANCÉS PARA A BIBLIOTECA
O pasado 16 de marzo a biblioteca do Instituto recibiu unha cuantiosa doazón de libros en francés, que se unen á sección nesta lingua, tan importante no centro. Os exemplares eran propiedade de Argentina Rivadulla Bao, coruñesa de nacemento, que viviu a maior parte da súa vida entre Francia e Dubai e que nos últimos anos foi veciña de Perillo. O seu gusto pola lectura levouna a posuír unha gran colección de libros en francés, cuxo destino debía ser, segundo a súa vontade, seguir alimentando a cultura, a imaxinación e a formación de novos lectores tras o seu pasamento, producido en abril de 2022. Cumprindo a promesa que lle fixeran, os seus herdeiros entregaron á biblioteca todos estes volumes, que se conservarán e disfrutarán en lembranza desta xenerosa veciña e da súa familia. Merci beaucoup!
Novo punto de intercambio de libros
Este curso 2022-2023 a biblioteca do IES Neira Vilas habilitou no andar baixo do instituto un punto de intercambio de libros. Nel pódese coller libremente o volume que se queira ler; a cambio só hai que deixar outro libro que xa se lera ou que se teña pola casa e non se utilice. O obxectivo é compartir as lecturas das que se disfrutou e descubrir outras novas.