Arquivo da categoría: Bachibac

Actividades, Alumnado, Bachibac, Curso 2025-2026, Curso Actual

PARTICIPACIÓN NO PROGRAMA EDUEXCHANGES

Un curso máis o noso centro resultou seleccionado para participar no Programa EduExchanges de intercambio presencial de alumnado con centros educativos doutros países durante o curso 2025-2026, segundo se recolle no portal da Consellería de Educación, Ciencia, Universidades e Formación Profesional: https://www.edu.xunta.gal/portal/node/48665
A axuda económica concedida ao abeiro deste programa, enmarcado na Estratexia Galega de Linguas Estranxeiras Edulingüe 2030, destinarase a financiar o intercambio do alumnado de 1º de Bacharelato que cursa o programa Bachibac co Lycée Saint François-Xavier de Vannes (Bretaña, Francia). Dito intercambio terá lugar do 6 ao 13 de febreiro.
Proximamente as familias do alumnado implicado serán convocadas a unha reunión no centro para informar de todas as cuestións relativas á organización do intercambio.
Bachibac, Curso 2025-2026, Curso Actual

VISITA DO AGREGADO DE COOPERACIÓN PARA O FRANCÉS E DA DIRECTORA DA ALLIANCE FRANÇAISE DA CORUÑA

No marco dos proxectos e accións relacionados co estudo do francés e da francofonía no noso instituto, este mércores 19 de novembro tivemos o enorme pracer de recibir no centro a Valérian Bayo-Rahona, agregado de cooperación para o francés na Embaixada francesa en Madrid e coordinador das Alianzas francesas de España, xunto con Sabrina Bermúdez, directora da Alliance française da Coruña. O obxectivo da visita era coñecer o proxecto plurilingüe do noso instituto, membro do selo “Label FrancÉducation” (https://www.labelfranceducation.fr/) e o único de toda Galicia no que se imparte o programa Bachibac, así como reforzar a cooperación lingüística arredor do francés e a colaboración coa Alliance française a través da presentación de múltiples proxectos nos que esperamos participar proximamente co noso alumnado francófono.

Bachibac, Curso 2025-2026, Curso Actual, Erasmus+

MESA REDONDA “O SISTEMA EDUCATIVO EN ESPAÑA E FRANCIA”

Este mércores 19 de novembro o alumnado de 1º de Bachibac participou nunha mesa redonda desenvolvida polos tres compañeiros/as que estiveron de intercambio en Francia a comezos de curso no marco do Consorcio Galemundo Acreditación Erasmus Escolar, así como polos seus tres correspondants franceses, que se atopan actualmente en inmersión no noso centro. O obxectivo era achegar ao alumnado Bachibac a realidade e características do sistema educativo francés, en canto á súa organización, materias e contidos que se estudan, sistemas de avaliación, procedemento de acceso á universidade…, e comparalo co funcionamento do sistema educativo galego. A actividade resultou moi proveitosa e permitiu ao alumnado de Bachibac participar da experiencia do intercambio Erasmus+ dos compañeiros/as e coñecer un pouco mellor a realidade educativa francesa. Moitas grazas a todos pola vosa participación e, en especial, a Marceau e a Mélissa!

O proxecto “Galemundo Acreditación Erasmus Escolar” está cofinanciado polo programa Erasmus+ da Unión Europea. O contido desta publicación é responsabilidade exclusiva do IES Plurilingüe Xosé Neira Vilas e nin a Comisión Europea, nin o Servicio Español para la Internacionalización de la Educación (SEPIE) son responsables do uso que poida facerse da información aquí difundida.

Bachibac, Curso 2025-2026, Curso Actual

ACOLLIDA DO ALUMNADO FRANCÉS DO INTERCAMBIO BACHIBAC

Do 9 ao 17 de outubro o noso centro acolleu ao alumnado francés do Lycée Saint François-Xavier de Vannes (Bretaña, Francia) no marco da viaxe de intercambio que o instituto organiza todos os anos para o alumnado que estuda 1º de Bacharelato no programa Bachibac. O noso estudantado xa estivo en Vannes a comezos do mes de marzo e en outubro acolleu nas súas casas á rapazada francesa. Durante a súa estadía o alumnado francés, acompañado das profesores Elodie Quidu e Nathalie Chopineaux, fixo inmersión lingüística asistindo a aulas no instituto e tamén visitou A Coruña, Santiago de Compostela e Lugo. Ademais, o venres 10 foi amablemente recibido na Casa do Concello polo alcalde de Oleiros, Ángel García Seoane, e a concelleira de ensino, María José Santos.
Como en anos anteriores, foi un auténtico pracer recibir ao profesorado e alumnado do SFX e agardamos voltar atoparnos moi pronto! Moitas grazas a todos/as pola vosa participación e implicación! Et à bientôt!
Alumnado, Bachibac, Curso 2024-2025, Curso Actual

CHARLA DE LAURA OMIL VOZMEDIANO SOBRE O BACHIBAC E OS ESTUDOS UNIVERSITARIOS EN FRANCIA

No marco das actividades desenvolvidas polo IES Plurilingüe Xosé Neira Vilas con motivo da celebración do 10º Aniversario da implantación do Bachibac no centro, o xoves 10 de abril tivemos o enorme pracer de contar coa presenza de Laura Omil Vozmediano, alumna egresada do programa Bachibac que actualmente cursa o segundo ano de Linguas estranxeiras aplicadas aos negocios na Université de Lille. Na charla, titulada “Do francés ao Bachibac, do Bachibac a Lille” e dirixida ao alumnado de 1º e 2º de Bachibac e ao alumnado de 4º ESO que cursa Xeografía e Historia en francés, Laura compartiu a súa experiencia persoal, aportando numerosas e valiosas reflexións e consellos para o alumnado francófono do noso instituto. A comunidade educativa do Neira quere agradecer a Laura a súa xenerosidade ao compartir o seu tempo e vivenzas con nós, así como felicitala polos seus logros persoais e académicos que, sen dúbida, seguirán crecendo nos vindeiros anos.

Bachibac, Curso 2024-2025, Curso Actual

REUNIÓN INFORMATIVA SOBRE O PROGRAMA BACHIBAC

O vindeiro xoves, 3 de abril, ás 18:00 h. terá lugar no centro unha reunión informativa sobre o programa de dobre titulación Baccalauréat-Bacharelato (Bachibac), que, dentro do ensino en Galicia, só existe no noso centro. A xuntanza está dirixida ao alumnado e ás familias do alumnado que actualmente cursa 3º e 4º ESO para que aquelas persoas interesadas en incorporarse ao programa en Bacharelato coñezan mellor como funciona, cal é o plan de estudos, que requisitos de acceso existen e outras cuestións de interese.

Bachibac, Curso 2024-2025, Curso Actual

CONVOCATORIA DA PROBA EXTERNA DE BACHIBAC PARA O CURSO 2024-25

A Dirección Xeral de Ordenación e Innovación educativa vén de publicar a convocatoria da proba externa do programa de dobre titulación de bacharel e baccalauréat (Bachibac) para o curso académico 2024-25 e de ditar instrucións para o seu desenvolvemento, que se poden consultar no seguinte enlace: https://www.edu.xunta.gal/portal/node/46297.
O alumnado de 2º Bacharelato que cursa este programa deberá inscribirse na proba externa, presentando o anexo I no centro, entre os días 4 e 8 de abril.
A proba externa terá lugar os días 29 e 30 de abril, segundo o horario e instrucións que se recollen no mesmo documento.

 

Bachibac, Curso 2024-2025, Curso Actual, Intercambios escolares

INTERCAMBIO DE BACHIBAC 1 CON VANNES

Do 7 ao 14 de marzo o alumnado de Bachibac de 1º de Bacharelato viaxou á localidade bretona de Vannes para levar a cabo a primeira parte do intercambio co lycée Saint François-Xavier, co que temos establecida unha sólida relación nos últimos catro cursos. Ao longo desa semana, os/as nosos/as alumnos/as asistiron ás clases no centro francés, acompañando aos seus correspondentes, e viviron acollidos polas familias destes.

O pase de diapositivas require JavaScript.

Asemade, gozaron dunha visita guiada á historia e o patrimonio de Vannes, organizada polo instituto SFX, e realizaron dúas excursións coas que puideron achegarse un pouco máis ao coñecemento da lingua, da cultura e da historia francesas: unha a Nantes, na que coñeceron o castelo dos Duques de Bretaña, a catedral, a arquitectura decimonónica e os formidables enxeños tecnolóxicos das Machines de l’Île inspirados na obra de Jules Verne, e outra a Lorient, onde puideron descubrir desde a Citadelle moderna de Port-Louis, enclave fundamental do comercio de Indias en tempos de Luis XIV, ata as construcións que formaban a gran base de submarinos alemáns da Segunda Guerra Mundial, integrada no chamado “Muro atlántico”.
A comunidade do Neira quere agradecer a sempre amable e entusiasta acollida brindada polo lycée Saint François-Xavier e, en particular, pola profesora Elodie Quidu e o alumnado participante nesta bela experiencia e que agardamos recibir no noso centro a comezos do curso que vén. Merci beaucoup et à bientôt!
Bachibac, Curso 2024-2025, Curso Actual

A DIRECTORA DE ORDENACIÓN E INNOVACIÓN EDUCATIVA VISITOU O NOSO CENTRO PARA COÑECER MÁIS DE PRETO O PROGRAMA BACHIBAC E O SEU PROFESORADO E ALUMNADO

O mércores, 15 de xaneiro, tivemos o enorme pracer de recibir a visita da Directora xeral de Ordenación e Innovación educativa, Judith Fernández, acompañada da responsable de Edulinguas, María Jesús Lorenzana, que se interesaron polo funcionamento e retos do programa Bachibac no décimo aniversario da súa implantación no noso instituto.
A nova máis detallada pode consultarse no seguinte enlace: https://www.edu.xunta.gal/portal/node/45550

La Voz de Galicia tamén se fixo eco desta visita; a nova completa pódese consultar aquí: https://www.lavozdegalicia.es/noticia/coruna/2025/01/16/ies-neira-vilas-oleiros-unico-galicia-obtiene-titulo-frances/0003_202501H16C6992.htm

Actividades, Alumnado, Bachibac, Curso 2024-2025, Curso Actual

PARTICIPACIÓN EN EDUEXCHANGES E REUNIÓN INFORMATIVA SOBRE O INTERCAMBIO DE BACHIBAC 1

Un curso máis o noso centro resultou seleccionado para participar no Programa EduExchanges de intercambio presencial de alumnado con centros educativos doutros países durante o curso 2024/2025, segundo se recolle no portal da Consellería de Educación, Ciencia, Universidades e Formación Profesional: https://www.edu.xunta.gal/portal/node/43431.
A axuda económica concedida ao abeiro deste programa, enmarcado na Estratexia Galega de Linguas Estranxeiras Edulingüe 2030, destinarase a financiar o intercambio do alumnado de 1º de Bacharelato que cursa o programa Bachibac co Lycée Saint François-Xavier de Vannes (Bretaña). Dito intercambio terá lugar do 6 ao 14 de marzo.
Este xoves, 16 de xaneiro, ás 18:00 h., celebrarase no centro unha reunión coas familias do alumnado implicado para informar de todas as cuestións relativas á organización do intercambio-