O pasado 20 de maio as nosas alumnas Alba Caridad Castro e Marta Fernández Villar recibían o primeiro premio e accesit para a categoría de alumnado de 1º e 2º de ESO no XI Certame literario Descubrindo Oleiros organizado polo SNL municipal.
Noraboa!!!!
Imaxe tomada do instagram do Concello de Oleiros
O día 15 comezou a celebración das Letras Galegas no IES Neira Vilas. E non podía haber mellor maneira de empezar que saíndo ao torreiro coa Agrupación Folklórica Aturuxo!
Os grupos de terceiro da ESO asistiron, na Fábrica, a unha xornada ben especial con aquelas persoas que forman parte de Aturuxo. Desde a emoción de quen acompañou as Pandereteiras de Mens polo mundo e desde o espazo do querer pola nosa tradición oral de cantadoras e tocadoras, coñecemos un chisquiño máis a historia das mulleres que nos transmitiron un tesouro. Pero non só! Tamén puxemos en práctica o aprendido e subimos ao palco para sacar punto e ata houbo quen se animou a facer soar as ferreñas!
Grazas ben sentidas por esta oportunidade de gozar cos maneos e as muiñeiras, A.F. Aturuxo! Foi unha xornada chea de ledicia e emoción!
O pasado 9 de abril, os grupos de 4º da ESO continuaron co proxecto de recuperación da memoria e participaron, na Fábrica de Perillo, nun encontro coa autora da novela A ladroa da biblioteca de Meirás.
Eva Mejuto fixo un percorrido polas personaxes da novela, quen ou que lle deu a clave e a inspiración para a súa creación e desvendou a importancia dos lugares como Meirás nos acontecementos da historia.
A parte da documentación previa a escribir causou bastante impresión, leva moito traballo e poucas veces se fala dela, así como as escollas do multiperspectivismo. Tamén foi moi interesante saber que a presentación do libro do noso profe de historia, Manuel, tivo moito que ver no nacemento desta narración.
Ao final da sesión, Eva Mejuto asinou os exemplares da obra e o alumnado trouxo de volta unha lembranza inesquecible consigo.
Grazas ao Servizo de Normalización do Concello de Oleiros, os grupos de terceiro da ESO puideron asistir a unha contada feita por Celso Fernández Sanmartín no salón de actos do noso centro.
Comezou o contador expoñendo as orixes do seu interés pola literatura de transmisión oral, para, a continuación, destacar a importancia dos nosos contos populares en todo o mundo. Seguimos as aventuras compostelanas sen perder de vista os consellos da avoa do autro. E todo isto entre conto e conto e cando nos quixemos decatar… tocou o timbre! Soubo ben a pouco e quedamos con ganas de saber máis así que faremos o que nos recomendou Celso: aproveitaremos o que aprendemos en Sopa de pedra para viaxar moi, moi, moi lonxe!
De coplas e versos. A poesía no cancioneiro popular galego é desas actividades que cambian a cor do día xa que Apiario, na palabra de Antía Otero, converteu a mañá nunha copla que uniu o pasado, o presente e o futuro.
O alumnado de primeiro de bacharelato, en dúas sesións inesquecibles, participou na proposta de achegarse á riqueza da literatura de tradición oral desde diferentes recursos e músicas, pero o máis sorprendente foi a creación colectiva e o recital en que puxeron en común as propias creacións. E o certo é que a escrita está de parabéns con esta rapazada que supón o futuro das Letras Galegas!
No Día da Lingua Materna, 21 de febreiro, o alumnado de 1º de Bacharelato acudiu ao Auditorio Gabriel García Márquez, en Mera, para gozar dunha especulación improvisada feita pola compañía Galeatro.
O alumnado foi protagonista e encheron as partes incompletas dun estraño códice medieval que axudou a que as catro persoas comediantes puidesen representar os seus entremeses. A música, a improvisación e o oficio da escrita fixeron que esta posta en escena estivese arrodeada de risas porque a Idade Media tamén pode ser moi, moi, moi divertida!
O Festival Falando a Boca Chea inicia unha nova edición e grazas ao SNL do Concello de Oleiros, o alumnado de 2º da ESO participa deste encontro de narración oral que nace en 2017 e que, cada ano, medra máis e máis.
Nesta ocasión, o venres 7 de febreiro o improvisador Josiño da Teixeira fixo un percorrido pola historia dos brindos e as regueifas que nos deixou de boca aberta. Que impresión coñecer as conexións que nos unen a Cuba, a Portugal ou ao País Vasco entre moitas outras culturas! Nin que dicir ten que nós tamén queriamos formar parte desta historia e aló nos botamos a regueifar seguindo as indicacións de Josiño da Teixeira! Seguir lendo Festival Falando a Boca Chea