Arquivo da categoría: Departamento de Lingua Galega

Actividades, Curso 2024-2025, Curso Actual, Departamento de Lingua Galega, Departamento de Xeografía e Historia, Equipo de Dinamización da Lingua Galega

Encontro con Eva Mejuto

O pasado 9 de abril, os grupos de 4º da ESO continuaron co proxecto de recuperación da memoria e participaron, na Fábrica de Perillo, nun encontro coa autora da novela A ladroa da biblioteca de Meirás.

Eva Mejuto fixo un percorrido polas personaxes da novela, quen ou que lle deu a clave e a inspiración para a súa creación e desvendou a importancia dos lugares como Meirás nos acontecementos da historia.

A parte da documentación previa a escribir causou bastante impresión, leva moito traballo e poucas veces se fala dela, así como as escollas do multiperspectivismo. Tamén foi moi interesante saber que a presentación do libro do noso profe de historia, Manuel, tivo moito que ver no nacemento desta narración.

Ao final da sesión, Eva Mejuto asinou os exemplares da obra e o alumnado trouxo de volta unha lembranza inesquecible consigo.

Actividades, Curso 2024-2025, Curso Actual, Departamento de Lingua Galega, Equipo de Dinamización da Lingua Galega

Festival Boca Chea con Celso Fernández Sanmartín

Grazas ao Servizo de Normalización do Concello de Oleiros, os grupos de terceiro da ESO puideron asistir a unha contada feita por Celso Fernández Sanmartín no salón de actos do noso centro.

Comezou o contador expoñendo as orixes do seu interés pola literatura de transmisión oral, para, a continuación, destacar a importancia dos nosos contos populares en todo o mundo. Seguimos as aventuras compostelanas sen perder de vista os consellos da avoa do autro. E todo isto entre conto e conto e cando nos quixemos decatar… tocou o timbre! Soubo ben a pouco e quedamos con ganas de saber máis así que faremos o que nos recomendou Celso: aproveitaremos o que aprendemos en Sopa de pedra para viaxar moi, moi, moi lonxe!

Actividades, Curso 2024-2025, Curso Actual, Departamento de Lingua Galega, Equipo de Dinamización da Lingua Galega

Espectáculo multimedia de Yolanda Castaño

Neste obradoiro poético en que as letras encontran acubillo entre as imaxes, música, recitado ou referencias a mundos diversos, o alumnado de segundo de bacharelato gozou de aprender desde o achegamento emocional e sensitivo.

O camiño entre os versos, que xa coñeciamos das aulas, converteuse en real e andamos entre poemas de A segunda lingua, O libro da egoísta, Punver ou Materia como quen acompaña a literatura desde o sentir máis intenso.

O coloquio con Yolanda Castaño no final da sesión foi, ademais, moi enriquecedor e reflexionamos coa poeta de temas tan interesantes como a creación poética ou a situación actual de Sargadelos.

Sen querer marchar, chegou o tempo de regresar ao instituto, pero levamos con nós todas as ganas de mergullar nos poemarios de Yolanda Castaño e continuar esta viaxe poética.

Actividades, Curso 2024-2025, Curso Actual, Departamento de Lingua Galega, Equipo de Dinamización da Lingua Galega

De coplas e versos

De coplas e versos. A poesía no cancioneiro popular galego é desas actividades que cambian a cor do día xa que Apiario, na palabra de Antía Otero, converteu a mañá nunha copla que uniu o pasado, o presente e o futuro.

O alumnado de primeiro de bacharelato, en dúas sesións inesquecibles, participou na proposta de achegarse á riqueza da literatura de tradición oral desde diferentes recursos e músicas, pero o máis sorprendente foi a creación colectiva e o recital en que puxeron en común as propias creacións. E o certo é que a escrita está de parabéns con esta rapazada que supón o futuro das Letras Galegas!

Actividades, Curso 2024-2025, Curso Actual, Departamento de Lingua Galega, Equipo de Dinamización da Lingua Galega

A poesía non morde

O alumnado de segundo da ESO asistiu ao espectáculo poético de Yolanda Castaño A poesía non morde e nel gozamos dun universo poético inzado de imaxes que nos engaiolaron.

Poesía do fútbol, dos caramelos, do verán e dos bos momentos compartidos foron os leitmotiv desta xuntanza, nas Torres de Santa Cruz. Impresionounos aprender como o cotiá tamén pode ser poetizable! E, sen dúbida, habemos de darlle bo uso a estas novas ferramentas poéticas que traemos connosco de volta para o instituto!

 

Actividades, Curso 2024-2025, Curso Actual, Departamento de Lingua Galega, Equipo de Dinamización da Lingua Galega

Superheroes 1º ESO

O grupos de primeiro da ESO, achegáronse este venres 28 de marzo, á Biblioteca Rialeda para participar na actividade Superheroes, a nova mitoloxía a cargo do ilustrador Miguel Cuba.

A rapazada gozou das aventuras e das narracións fantásticas e, ademais, explorou cales son as relacións que teñen estas personaxes coas das mitoloxías clásicas como a grega ou a exipcia. Foi realmente sorprendente descubrir que as bandas deseñadas, como as que lemos hoxe en día, teñen tantas conexións co pasado!

Con todas estas ideas a rebulir nas cabezas non foi difícil poñelas en práctica e, antes de regresar ao instituto, afiamos os lapis e as cores e… creamos as nosas propias superheroínas e superheroes!

O pase de diapositivas require JavaScript.

Curso 2024-2025, Curso Actual, Departamento de Lingua Galega, Equipo de Dinamización da Lingua Galega

OBRADOIRO CON YOLANDA CASTAÑO

O pasado 12 de marzo as alumnas e os alumnos de 4º ESO gozamos da sabedoría entusiasta que nos transmitiu Yolanda Castaño no obradoiro “Muller, escritora, en galego… e polo mundo!” nas Torres de Santa Cruz.

Desde a súa alma de poeta soubo transmitirnos esa cativadora atracción pola poesía dende ben nova cando escoitaba os versos que a voz grosa, forte e ousada de Gloria Fuertes a levaron a mergullarse nun mundo no que ela ía pasar de ser admiradora a ser admirada e do que nunca máis querería saír. 

Da man da súa familia e das súas referentes, principalmente Rosalía de Castro, Yolanda Castaño non deixou de dar pasos. 

Como ese primeiro paso de 3ºA a 3ºB que, cheo de medo, a preparou para todos os seguintes, xa nunca máis con medo pero si con moitos atrancos no camiño. Con dedicación, esforzo e moito traballo alcanzou as súas metas e puido compartir todo o que ela sente e é por todo o mundo. 

Quen diría que unha mozo co desexo adolescente de conseguir un pantalón caro de coiro chegaría ao corazón e ao sentir de tantas persoas!

Esperemos que volvamos atoparnos con moitos suxeitos pensantes como ela se define e que, desde o seu proxecto máis persoal e querido, siga enchendo as mentes dos que se achegan á forza da palabra con letras, pensamentos, soños e desexos de todas as poetas que dende o corazón da Coruña espallan as súas creacións e o seu traballo ao mundo. 

Grazas polos sentidos e inspiradores versos de Mazás do xardín de Tolstoi…

Alumnado, Curso 2024-2025, Curso Actual, Departamento de Lingua Castelá, Departamento de Lingua Galega, Departamento de Matemáticas, Departamento de Tecnoloxía, Equipo de Dinamización da Lingua Galega

ENTROIDO 2025

Despois dunha semana intensa en que os mandados do Meco aledaron o noso instituto, chegou, por fin!, o día da celebración do Entroido.

Comezamos cedo aprendendo todiño sobre o amoado, como transformalo en filloas e, sobre todo, devoramos máis de setecentas!

No recreo brincamos cos xogos e propostas que nos fixeron as persoas de terceiro da ESO e corremos moito para escapar dos Farrumecos de Xunqueira de Ambía. Pero non foi este o único entroido tradicional que recuperamos, non… No concurso de portas de entroido reproducíronse pantallas, cigarróns, peliqueiros e ata o Touro Xigante de Celavente.

O máis esperado do Entroido son sempre os testamentos e este ano non ía ser menos. Desde o alumnado de primeiro ata o de cuarto da ESO as coplas cheas de retranca voaron no patio para provocar unha boa morea de risas. Ata a profe de galego se animou cos testamentos! O peor disto é que agora temos que esperar outro ano polos seguintes. Aproveitade para ir afiando os lapis!

Rematamos a festa cun divertidísimo desfile de Piratullas, Farrumecos, xogadoras de fútbol, presentadoras de televisión, casamentos, Minions, artistas dos anos 20 do século XX, animais, cociñeiras e personaxes de debuxos, etc E non podemos esquecer o dificilísimo traballo que tivo o xurado para decidir porque todos os disfraces foron espectaculares!

E coa ansia de repetir… comezamos a conta cara atrás para o próximo entroido!

Curso 2024-2025, Curso Actual, Departamento de Lingua Galega, Equipo de Dinamización da Lingua Galega

CELEBRACIÓN DO DÍA DE ROSALÍA DE CASTRO

O pase de diapositivas require JavaScript.

Chega o día, chega a romaría… Xa é o Día de Rosalía! Se hai unha conmemoración especial no IES Plurilingüe Xosé Neira Vilas, ese é o Día de Rosalía de Castro! E non hai mellor maneira de celebrar que mergullando nos seus textos!
O alumnado de Bacharelato seguiu a proposta da Asociación de Escritoras/es en Lingua Galega e agasallou unha flor ás persoas do centro porque “Nasín cando as prantas nasen,/ no mes das froles nasín…” Seguir lendo CELEBRACIÓN DO DÍA DE ROSALÍA DE CASTRO →

Curso 2024-2025, Curso Actual, Departamento de Lingua Castelá, Departamento de Lingua Galega, Equipo de Dinamización da Lingua Galega

TEATRO “ARTE SEN GUIÓN”

No Día da Lingua Materna, 21 de febreiro, o alumnado de 1º de Bacharelato acudiu ao Auditorio Gabriel García Márquez, en Mera, para gozar dunha especulación improvisada feita pola compañía Galeatro.

O alumnado foi protagonista e encheron as partes incompletas dun estraño códice medieval que axudou a que as catro persoas comediantes puidesen representar os seus entremeses. A música, a improvisación e o oficio da escrita fixeron que esta posta en escena estivese arrodeada de risas porque a Idade Media tamén pode ser moi, moi, moi divertida!