O luns 18 de decembro comezaron as sesións de formación avanzada en mediación para un grupo de alumnas e alumnos de 2º e 3º ESO e 1º de Bacharelato que forman o equipo de mediadores/as do centro. A formación, subvencionada polo Concello de Oleiros e inscrita nas accións previstas no Plan de convivencia do instituto, continuará no mes de xaneiro con novas sesións para o alumnado e tamén para o profesorado.
Os días 18, 19 e 20 de decembro tiveron lugar varios talleres de xestión emocional impartidos por Sara Vierna, de Almas Meraki, ao alumnado de 3º ESO. A actividade estivo financiada pola ANPA Arce do noso instituto e tivo o obxectivo de traballar e dotar ao alumnado de ferramentas para tomar conciencia das situacións que lles provocan malestar, repensar as súas identidades e potenciar competencias persoais como a regulación emocional.
Con motivo da celebración do Día internacional para a eliminación da violencia contra as mulleres o 25N, o pasado venres 24 de novembro o Concello de Oleiros instalou un Punto violeta no noso instituto para achegar ao alumnado información e reflexións sobre as violencias sexuais, o consentimento ou a influencia do porno na adolescencia. Asemade, os grupos de 4º ESO e 1º Bacharelato puideron participar nos obradoiros que sobre estas temáticas foron impartidos ao longo da mañá.
Fotografías realizadas polo Concello de Oleiros.
Este mes de novembro comezaron a desenvolverse no noso centro os obradoiros de técnicas de estudo, dirixidos ao alumnado de 1º, 2º e 3º ESO e organizados e sufragados, como en cursos anteriores, pola ANPA Arce. As sesións son impartidas por Belén Pérez Sanmartín, especialista en técnicas de estudo e pedagoga en “Eleeméntal. Logopedia y Pedagogía”, situado en Perillo. O seu obxectivo é contribuír a dotar ao alumnado das ferramentas precisas para organizar o seu traballo, xestionar o tempo e desenvolver estratexias que permitan mellorar o seu estudo.
O noso centro vén de renovar un curso máis a súa participación no Plan de Mellora de Bibliotecas Escolares, que nesta ocasión supón a concesión dunha dotación económica de 1.070 € para adquisición de libros para a nosa biblioteca. Toda a información sobre esta convocatoria pódese consultar aquí: https://www.edu.xunta.gal/portal/node/40171.
Asemade, a pertenza ao Plambe implica formar parte dunha ampla rede de bibliotecas escolares de toda Galicia que colabora en iniciativas comúns, conta co respaldo da Asesoría de Bibliotecas e permite participar en diversas actividades e xornadas formativas, como a Xornada de Bibliotecas Escolares 2023, que tivo lugar este sábado, 18 de novembro, en Santiago de Compostela e á que asistiu a coordinadora da nosa biblioteca, a profesora Vanessa Liñares Vázquez.
O domingo 19 de novembro, o alumno de 4º de ESO Martín Pérez Lujano participou nun programa de radio, con alumnado doutros centros, sobre a violencia de xénero. O debate tivo lugar na emisora da cadea SER na Coruña. Premede aquí para escoitalo.
O alumnado de 4º de ESO da materia de Expresión Artística e parte do alumnado de 3º de ESO participaron nas sementeiras do proxectoTERRA.
A actividade consistía en analizar e debuxar o noso barrio dende unha perspectiva urbanística.
O obradoiro foi organizado pola profesora Camino Fernández Robelo do departamento de Artes Plásticas.
O noso centro foi seleccionado para participar en dous programas educativos do Plan Proxecta+ para o curso escolar 2023-2024: “Donas de si”, no ámbito da igualdade de xénero e a educación emocional, e “Correspondentes xuvenís”, no ámbito do voluntariado e a alfabetización informacional. As actuacións que se desenvolvan en cada programa ao longo do curso estarán coordinadas polas profesoras Cristina Emilia Novo Hernández e Cristina Vázquez Castro, respectivamente, e contarán coa participación do alumnado e de docentes de diversos departamentos.
A información completa sobre o Plan Proxecta+ pódese consultar na seguinte ligazón: https://www.edu.
A Consellería de Cultura, Educación, Formación Profesional e Universidades vén de publicar a Resolución do 29 de setembro de 2023, da Dirección Xeral de Ordenación e Innovación Educativa pola que se regula a xestión de probas deacreditación de competencia lingüística en linguas estranxeiras para o alumnado que curse estudos en centros públicos dependentes da Consellería de Cultura, Educación, Formación Profesional e Universidades durante o curso 2023/2024.
No noso centro, as probas, que se corresponderán co nivel B1, B2 ou C1 e que se realizarán durante o curso académico 2023/2024, están dirixidas ao alumnado de 1º e 2º de Bacharelato e de 4º de ESO, tendo preferencia aquel que curse ensinanzas plurilingües. Cada alumno ou alumna poderá matricularse nunha única proba dunha lingua estranxeira.
A citada resolución prevé a concesión dunha axuda económica por alumno/a para facer fronte aos custos de matrícula das probas de acreditación. A solicitude realízase desde o centro, pero é imprescindible que o alumnado interesado entregue un compromiso de presentación á proba correspondente, asinado polo seu pai, nai ou titor.
O documento co compromiso foi distribuído polo profesorado dos Departamentos de Inglés e Francés ao alumnado nas aulas e debe ser entregado a dito profesorado ou na secretaría do centro ata o venres, 27 de outubro.
