Arquivo da categoría: Alumnado

Alumnado, Curso 2025-2026, Curso Actual, Erasmus+

COMEZA O INTERCAMBIO ERASMUS+

Este domingo, 14 de setembro, comezou a viaxe das nosas alumnas Eva Blas e Alba Vieiro e o noso alumno Héctor Alba, de 1º de Bacharelato, que os levará a distintas localidades da rexión francesa de Amiens, onde vivirán coas familias francesas dos seus correspondentes e asistirán a clases nos institutos franceses Henri Martin, de Saint-Quentin, e Gay Lussac, de Chauny. Este intercambio insírese no marco do proxecto Galemundo Acreditación Erasmus Escolar, organizado pola Consellería de Cultura, Educación e Universidade da Xunta de Galicia e no que participa o noso centro xunto co CPI de Zas e o IES Eduardo Blanco Amor de Ourense. O intercambio terá unha duración dun mes, ata o 11 de outubro, e conlevará a correspondencia co alumnado francés, que será acollido no noso instituto entre o 25 de outubro e o 23 de novembro.
Bon voyage et très bon séjour à Eva, Alba et Héctor!
O proxecto “Galemundo Acreditación Erasmus Escolar” está cofinanciado polo programa Erasmus+ da Unión Europea. O contido desta publicación é responsabilidade exclusiva do IES Plurilingüe Xosé Neira Vilas e nin a Comisión Europea, nin o Servicio Español para la Internacionalización de la Educación (SEPIE) son responsables do uso que poida facerse da información aquí difundida.
Alumnado, Curso 2024-2025, Curso Actual

EN HORA BOA, JANA E ANXO!

Do 20 ao 22 de xuño celebrouse en Santiago de Compostela e Porto do Son o Campeonato de España de Selecciones Autonómicas de Orientación en Edad Escolar (CESA), no que os nosos alumnos Anxo Somoza Seoane e Jana Albarrán Oroza obtiveron uns resultados excepcionais: https://fedo.org/web/ultimas-noticias/6322-galicia-se-convierte-en-la-capital-de-la-orientacion-escolar-tras-acoger-el-cesa-2025. Moitos parabéns!
Imaxe tomada do perfil do Concello de Oleiros na rede X.
Alumnado, Curso 2024-2025, Curso Actual

PARABÉNS AO ALUMNADO DE 2º BACH PREMIADO NO ACTO MEGAU

O pasado venres, 20 de xuño, tivo lugar en Vigo o acto de recoñecemento ao alumnado de toda Galicia con mellores expedientes nas probas de acceso á universidade, organizado polas tres universidades do Sistema Universitario de Galicia, en colaboración coa Consellería de Educación, Ciencia, Universidades e Formación profesional.
Nese acto resultaron merecedores/as de recoñecemento polos seus excelentes resultados académicos seis alumnas e un alumno do noso centro que remataron o Bacharelato neste curso 2024-2025 e emprenden agora o seu camiño na formación superior. Trátase de Pelayo Blanco, Inés Cachón, Martina Cortizo, Antía González, Sofía López, Ana Torres e María Varela, catro das cales se achegaron a Vigo para recibir os parabéns transmitidos polo Conselleiro de Educación, así como polos tres rectores das Universidades galegas e o alcalde da cidade. Asemade, o noso instituto recibiu o seu recoñecemento correspondente pola labor docente que axudou a este alumnado excelente a desenvolver as súas capacidades e talentos. Moitos parabéns!
Alumnado, Curso 2024-2025, Curso Actual, Matrícula, Secretaría

MATRÍCULA NA ESO E BACHARELATO PARA O CURSO 2025-2026

De acordo coas instrucións da Consellería de Cultura, Educación, Formación profesional e Universidades, para formalizar a matrícula en ESO e Bacharelato para o curso 2025-2026 poderase utilizar o sistema de matrícula en liña ou de matrícula presencial no centro.
– MATRÍCULA EN LIÑA: Poderá realizarse desde un dispositivo móbil ou desde unha computadora empregando o aplicativo Admisión Alumnado (https://www.edu.xunta.gal/admisionalumnado/). Será necesario autenticarse con certificado dixital ou Chave 365. O alumnado que xa estivo escolarizado no curso 2024-2025 no sistema educativo galego recibirá unha ligazón de acceso ao aplicativo en Abalar Móbil.
Prazo de matrícula en liña: do 23 ao 7 de xullo. Cubriranse os datos no aplicativo Admisión Alumnado e achegarase a documentación restante en versión dixital. No seguinte enlace pódense consultar as instrucións para as familias sobre como facer a matrícula en liña: INSTRUCIÓNS PARA FAMILIAS. Ditas instrucións tamén están dispoñibles no aplicativo Admisión Alumnado.
– MATRÍCULA PRESENCIAL NO CENTRO: Realizarase do xeito habitual, a través da entrega do impreso de matrícula e documentación restante, na Secretaría do instituto en horario de 9:00 a 13:00 h. Por razóns organizativas, establécense as quendas de matrícula que se recollen no seguinte documento:
– DOCUMENTACIÓN NECESARIA PARA A MATRÍCULA: Tanto no caso de matricularse en liña, como no caso de matricularse presencialmente no centro, é preciso achegar unha serie de documentación. No seguinte ficheiro detállase cal é a documentación necesaria en función da modalidade de matrícula escollida e do curso no que se quere matricular: DOCUMENTACIÓN NECESARIA PARA A MATRÍCULA.
Asemade, recóllense, a continuación, varios modelos de documentos que é necesario achegar dixitalmente só no caso de realizar a matrícula en liña (no caso de realizar a matrícula presencialmente ditos documentos están incluídos no impreso de matrícula correspondente):
– IMPRESOS DE MATRÍCULA: Publícanse os impresos de matrícula dos distintos cursos para aquelas familias que decidan matricularse presencialmente no centro e tamén para a información e orientación das familias que decidan matricularse en liña. Unha copia en papel do impreso correspondente será entregada ao alumnado co boletín de notas o día 26 de xuño ás 10:00 h.:
Impreso de matrícula de 1º, 2º e 3º ESO
Impreso de matrícula de 4º ESO
Impreso de matrícula de 1º Bacharelato
Impreso de matrícula de 2º Bacharelato

 

Alumnado, Curso 2024-2025, Curso Actual

EN HORA BOA, OLIVIA!

Do 7 ao 15 de xuño celebrouse a Final da Copa do Mundo de Patinaxe artística na cidade italiana de Reggio Emilia. Alí a patinadora xuvenil do CPA Maxia e alumna do noso centro, Olivia Rey, demostrou as súas excelentes cualidades deportivas e obtivo a medalla de prata. Noraboa, Olivia!

Imaxe tomada do perfil do Concello de Oleiros na rede X.

Alumnado, Curso 2024-2025, Curso Actual

CONVOCATORIA DOS PREMIOS EXTRAORDINARIOS DE ESO AO RENDEMENTO ACADÉMICO (PEE) CORRESPONDENTES AO CURSO 2024-2025

O 11 de xuño publicouse no DOG a orde pola que se convocan os premios extraordinarios de ESO ao rendemento académico, destinados ao alumnado que cursase 4º ESO nun centro docente da Comunidade autónoma de Galicia no curso 2024-2025.
Para optar a un dos 20 premios extraordinarios, dotados con 1.000 € cada un, o alumnado interesado deberá, en primeiro lugar, realizar a proba PEE, que se levará a cabo o día 26 de xuño no lugar que se publicará no portal educativo e na páxina Premiosedu (https://www.edu.xunta.gal/premiosedu/).
Para matricularse na proba PEE o alumnado deberá presentar no instituto o Anexo I debidamente cuberto. O prazo de matrícula está aberto do 12 ao 18 de xuño, ambos inclusive. Aínda que non hai requisito de nota media mínima na ESO para matricularse na proba PEE, para a solicitude do premio extraordinario, en caso de obter unha das vinte mellores cualificacións, si hai un requisito de nota media mínima na ESO de 9 puntos (sen contar a materia de Relixión). Polo tanto, é aconsellable que se matricule na proba só aquel alumnado que teña unha perspectiva realista de acadar esa nota media mínima.
Con posterioridade á realización da proba, unha vez publicadas as cualificacións definitivas da mesma, o alumnado que resultase merecedor dun dos premios deberá formalizar unha solicitude para optar á subvención do premio extraordinario de ESO.
Toda a información sobre a proba PEE, así como o Anexo I para formalizar a matrícula, pode consultarse na páxina web PremiosEdu: https://www.edu.xunta.gal/premiosedu/
Alumnado, Curso 2024-2025, Curso Actual

ACTO DE GRADUACIÓN DA NOVA PROMOCIÓN DE BACHARELATO 2023-2025

O xoves 22 de maio tivo lugar o emotivo acto de graduación da nova promoción de Bacharelato 2023-2025 no Auditorio Gabriel García Márquez de Mera, coa participación de todos os membros da nosa comunidade educativa e coa presenza do Alcalde de Oleiros, Ángel García Seoane, e da Concelleira de Cultura, Normalización lingüística, Ensino e Xuventude, María José Santos Zas. Nel tamén celebramos a graduación da décima promoción de Bachibac do noso centro, culminando así un curso de celebracións dos dez anos da implantación deste programa no noso instituto.
Moitos parabéns e moita sorte aos/ás nosos/as novos/as bachareis nesta nova etapa apaixoante que comeza nas súas vidas!