Arquivo da categoría: Curso 2024-2025
NORABOA, OLIVIA!
Do 7 ao 15 de xuño celebrouse a Final da Copa do Mundo de Patinaxe artística na cidade italiana de Reggio Emilia. Alí a patinadora xuvenil do CPA Maxia e alumna do noso centro, Olivia Rey, demostrou as súas excelentes cualidades deportivas e obtivo a medalla de prata. Noraboa, Olivia!
Imaxe tomada do perfil do Concello de Oleiros na rede X.
CONVOCATORIA DOS PREMIOS EXTRAORDINARIOS DE ESO AO RENDEMENTO ACADÉMICO (PEE) CORRESPONDENTES AO CURSO 2024-2025
O 11 de xuño publicouse no DOG a orde pola que se convocan os premios extraordinarios de ESO ao rendemento académico, destinados ao alumnado que cursase 4º ESO nun centro docente da Comunidade autónoma de Galicia no curso 2024-2025.
Para optar a un dos 20 premios extraordinarios, dotados con 1.000 € cada un, o alumnado interesado deberá, en primeiro lugar, realizar a proba PEE, que se levará a cabo o día 26 de xuño no lugar que se publicará no portal educativo e na páxina Premiosedu (https://www.edu.xunta.gal/
Para matricularse na proba PEE o alumnado deberá presentar no instituto o Anexo I debidamente cuberto. O prazo de matrícula está aberto do 12 ao 18 de xuño, ambos inclusive. Aínda que non hai requisito de nota media mínima na ESO para matricularse na proba PEE, para a solicitude do premio extraordinario, en caso de obter unha das vinte mellores cualificacións, si hai un requisito de nota media mínima na ESO de 9 puntos (sen contar a materia de Relixión). Polo tanto, é aconsellable que se matricule na proba só aquel alumnado que teña unha perspectiva realista de acadar esa nota media mínima.
Con posterioridade á realización da proba, unha vez publicadas as cualificacións definitivas da mesma, o alumnado que resultase merecedor dun dos premios deberá formalizar unha solicitude para optar á subvención do premio extraordinario de ESO.
Toda a información sobre a proba PEE, así como o Anexo I para formalizar a matrícula, pode consultarse na páxina web PremiosEdu: https://www.edu.
ACTO DE GRADUACIÓN DA NOVA PROMOCIÓN DE BACHARELATO 2023-2025
O xoves 22 de maio tivo lugar o emotivo acto de graduación da nova promoción de Bacharelato 2023-2025 no Auditorio Gabriel García Márquez de Mera, coa participación de todos os membros da nosa comunidade educativa e coa presenza do Alcalde de Oleiros, Ángel García Seoane, e da Concelleira de Cultura, Normalización lingüística, Ensino e Xuventude, María José Santos Zas. Nel tamén celebramos a graduación da décima promoción de Bachibac do noso centro, culminando así un curso de celebracións dos dez anos da implantación deste programa no noso instituto.
Moitos parabéns e moita sorte aos/ás nosos/as novos/as bachareis nesta nova etapa apaixoante que comeza nas súas vidas!
Celebración do día das letras galegas 2025
O alumnado de terceiro da ESO puxo o ramo a esta celebración do Día das Letras Galegas cunha xornada de xogos populares e cunha actuación das Cantaneiras.
Así, na pista leváronse a cabo unha serie de retos cos que nos divertimos ben, mentres que na parte superior se desenvolvía o concurso de recitado. Nin que dicir ten que estivo do máis axustado e que o xurado o tivo moi complicado, pero, ao final, fixéronse co trunfo Alex García e Martín Borrazás de 3º ESO C
Pechamos o Día das Letras Galegas cunha marabillosa recolla e interpretación das Cantaneiras que se nos fixo super breve e quedamos con ganas de máis!
VISITA A REPSOL
O pasado 21 de maio, o alumnado de cuarto da ESO que ten intención de facer o bacharelato na rama de ciencias, visitou a Refinería de Repsol de A Coruña, na que lles explicaron o proceso de obtención de tódalas sustancias que se extraen do petróleo que chega ao porto exterior, a forma de conducilo e tamén a de reparto dos productos que se obteñen tanto por terra como por mar. Tamén foron informados de proxectos de colaboración coas institucións locais nos que está inmersa a empresa e das novas formas e utilizacións da enerxía. A visita finalizou cun pincho nas instalacións que foi moi agradecido, despois dun longo percorrido en bus ao longo dos dous concellos que ocupa para explicar cada unha das partes da planta industrial.
CONVOCATORIA DOS PREMIOS EXTRAORDINARIOS DE BACHARELATO (PEB) CORRESPONDENTES AO CURSO 2024-2025
O alumnado que rematou o Bacharelato na convocatoria ordinaria do curso 2024-2025 nun centro docente da Comunidade autónoma de Galicia e que teña unha media dos dous cursos de Bacharelato igual ou superior a 8,75 (sen contar a materia de Relixión) pode presentarse á proba para a obtención do premio extraordinario de Galicia (PEB), que ten unha dotación de 1.000 € para cada un/ha dos/as 20 mellores resultados na citada proba. A proba terá lugar o día 18 de xuño e os lugares de realización publicaranse no portal educativo e na páxina de PremiosEdu.
Para matricularse na proba PEB o alumnado deberá presentar no instituto o Anexo I debidamente cuberto. O prazo de matrícula está aberto do 4 ao 10 de xuño de 2025, ambos inclusive.
Con posterioridade á realización da proba, unha vez publicadas as cualificacións definitivas da mesma, o alumnado que resultase merecedor dun dos premios deberá formalizar unha solicitude para optar á subvención do premio extraordinario de Bacharelato.
Toda a información sobre a proba PEB, así como o Anexo I para formalizar a matrícula, pode consultarse na páxina web PremioEdu: https://www.edu.
XORNADAS DE ACOLLIDA DO NOVO ALUMNADO DE 1º ESO PARA O CURSO 2025-2026
Como xa vén sendo costume no noso instituto dende hai moitos anos, este venres, 30 de maio, levouse a cabo unha xornada de acollida do alumnado de 6º EP do noso centro adscrito, o CEIP Ramón-María del Valle-Inclán, co obxectivo de facilitar o tránsito de Primaria a Secundaria e de que o futuro alumnado de 1º ESO no curso que vén coñeza o centro. Esta xornada foi organizada polo Equipo de Medición do centro de maneira que o alumnado mediador guiou a visita do novo alumnado repartido en grupos mostrando tódalas estancias e posibilidades do noso instituto.
Esta iniciativa completarase o luns, 2 de xuño, cunha reunión dirixida ás familias deste alumnado e que terá lugar ás 18:00 h. no Salón de actos do centro coa intención de dar a coñecer o funcionamento e características do instituto e resolver as eventuais dúbidas que puideran xurdir ante a nova etapa educativa que comezará a rapazada que empeza a Secundaria o curso que vén.
AXUDAS PARA A ADQUISICIÓN DE MATERIAL ESCOLAR NO CURSO 2025/26
Do 16 de maio ao 20 de xuño está aberto o prazo para solicitar as axudas para a adquisición de material escolar para o curso 2025-2026. Ditas axudas concédense ao abeiro da Orde do 28 de abril de 2025 pola que se regula a participación no fondo solidario de libros de texto e se convocan axudas para adquirir libros de texto e material escolar destinadas ao alumnado matriculado en educación primaria, educación secundaria obrigatoria e educación especial en centros docentes sostido con fondos públicos para o curso escolar 2025/26 (https://www.xunta.
No caso do noso instituto, ao ser un centro E-Dixgal, unicamente se poden solicitar as axudas para material escolar.
A solicitude das axudas farase preferiblemente por vía electrónica no formulario normalizado (Código de procedemento ED330B) dispoñible na aplicación Fondolibros (https://www.edu.xunta.gal/
Noraboa Carla e Jana!
O pasado17 e 18 de maio celebrouse o campionato de España de Centros Escolares de Orientación. Alí destacaron as boísimas clasificacións das nosas alumnas Carla Somoza e Jana Albarrán. Parabéns ás dúas!!!
Imaxes tomadas da paxina web da Federación Española de Orientación