O pasado 23 de abril a Biblioteca do IES Neira Vilas adicou o Día do Libro ao alumnado que leu máis libros no que levamos de curso. E por ser lector@s asidu@s recibiron un vale para mercar un libro. Noraboa aos premiados que foron: Sofía Arruñada Prego, Issouf Kone, Valentino Lobatón Pinedo e Sofía Valentina Ospino.
Este curso celebrouse o Día Internacional do Libro por todo o alto! Ao longo de toda a semana puidéronse coñecer as numerosas recomendacións literarias feitas polo alumnado, profesorado e PAS do centro expostas nun mural confeccionado polo equipo de biblioteca no andar baixo.
E o domingo, 23 de abril, pola mañá, tres representantes do noso club de lectura “O faiado de Balbino”, Inés Rucci, Óscar López e Sergio Domínguez, leron diversos fragmentos dalgúns dos seus libros favoritos na actividade organizada pola Librería Berbiriana da Coruña. As obras escollidas foron, respectivamente, “La historia interminable” de Michael Ende, “Non penses nun elefante rosa” de Antía Yáñez e “El bestario de Axlin”, primeiro tomo da triloxía “Guardianes de la ciudadela” de Laura Gallego. Moitas grazas a todxs pola participación!
A información sobre a biblioteca dispoñible na páxina web do instituto vén de ser renovada e actualizada polo seu equipo. Desde esta semana poden consultarse nela as normas de uso da biblioteca e información detallada sobre a súa historia, os servizos que presta,os fondos que posúe, o enlace ao catálogo en liña e as numerosas actividades que desenvolve.
O pasado 16 de marzo a biblioteca do Instituto recibiu unha cuantiosa doazón de libros en francés, que se unen á sección nesta lingua, tan importante no centro. Os exemplares eran propiedade de Argentina Rivadulla Bao, coruñesa de nacemento, que viviu a maior parte da súa vida entre Francia e Dubai e que nos últimos anos foi veciña de Perillo. O seu gusto pola lectura levouna a posuír unha gran colección de libros en francés, cuxo destino debía ser, segundo a súa vontade, seguir alimentando a cultura, a imaxinación e a formación de novos lectores tras o seu pasamento, producido en abril de 2022. Cumprindo a promesa que lle fixeran, os seus herdeiros entregaron á biblioteca todos estes volumes, que se conservarán e disfrutarán en lembranza desta xenerosa veciña e da súa familia. Merci beaucoup!
Este curso 2022-2023 a biblioteca do IES Neira Vilas habilitou no andar baixo do instituto un punto de intercambio de libros. Nel pódese coller libremente o volume que se queira ler; a cambio só hai que deixar outro libro que xa se lera ou que se teña pola casa e non se utilice. O obxectivo é compartir as lecturas das que se disfrutou e descubrir outras novas.
A nosa biblioteca celebrou o Día da muller e da nena na ciencia o 11 de febreiro plantexándolle un reto ao alumnado. Tratábase de identificar diversos inventos e descubrimentos realizados por mulleres científicas ao longo da historia. A actividade completouse co mural no que se expuxeron esas aportacións ao longo de toda a semana e cunha exposición de libros STEM escritos por mulleres científicas. Seguimos traballando e avanzando cara á plena igualdade en todos os campos de coñecemento e en todos os ámbitos da vida.
Tras a volta do Nadal botou a andar o novo club de lectura do noso instituto, “O faiado de Balbino”. A iniciativa inclúe numerosos grupos de lectura, coordinados polo profesorado do centro e dirixidos ao alumnado dos distintos cursos e ás súas familias:
– Grupo”Historias fantásticas da Mitoloxía”, coordinado por David Amboage.
– Grupo de banda deseñada en galego “Cousas” e grupo das familias “Cantarolas”, coordinados por Elisabet Ríos.
– Grupo de portugués “Xs Lusíadxs”, coordinado por Noé Vázquez.
– Grupo de castelán “Bululú”, coordinado por Guadalupe Pardo.
– Grupo de Xeografía e Historia “Caderno de Bitácora” e grupo LGTBIQ+ “Diversx”, coordinados por Mercedes López-Mayán.
Ata a data celebráronse xa numerosas xuntanzas e desenvolvéronse varias lecturas e proxectos relacionados. E isto non fixo máis que comezar!
Boas lecturas!