Arquivo da categoría: Curso Actual

Alumnado, Curso 2024-2025, Curso Actual, Xefatura de Estudos

CONVOCATORIA DOS PREMIOS EXTRAORDINARIOS DE BACHARELATO (PEB) CORRESPONDENTES AO CURSO 2024-2025

O alumnado que rematou o Bacharelato na convocatoria ordinaria do curso 2024-2025 nun centro docente da Comunidade autónoma de Galicia e que teña unha media dos dous cursos de Bacharelato igual ou superior a 8,75 (sen contar a materia de Relixión) pode presentarse á proba para a obtención do premio extraordinario de Galicia (PEB), que ten unha dotación de 1.000 € para cada un/ha dos/as 20 mellores resultados na citada proba. A proba terá lugar o día 18 de xuño e os lugares de realización publicaranse no portal educativo e na páxina de PremiosEdu.
Para matricularse na proba PEB o alumnado deberá presentar no instituto o Anexo I debidamente cuberto. O prazo de matrícula está aberto do 4 ao 10 de xuño de 2025, ambos inclusive.
Con posterioridade á realización da proba, unha vez publicadas as cualificacións definitivas da mesma, o alumnado que resultase merecedor dun dos premios deberá formalizar unha solicitude para optar á subvención do premio extraordinario de Bacharelato.
Toda a información sobre a proba PEB, así como o Anexo I para formalizar a matrícula, pode consultarse na páxina web PremioEdu: https://www.edu.xunta.gal/premiosedu/.
Anpa, Curso Actual

ACTIVIDADES EXTRAESCOLARES ANPA: ENGLISH CLUB e LE CLUB FRANÇAIS CURSO 2025/26

ACTIVIDADES ANPA:  ENGLISH CLUB e LE CLUB FRANÇAIS 

A Anpa Arce do IESP Xosé Neira Vilas oferta para este curso2025/26 dúas actividades extraescolares de idiomas os xoves en horario de tarde de 16:15 a 17:45, que  comenzarán a primeira semana de outubro.

Temos unha novidade para o alumnado de 1º e 2º da ESO, clases de francés en LE CLUB FRANÇAIS.

As prazas son limitadas e a adxudicación será por orde de solicitude con preferencia para socios/as.

 

Xa podes solicitar a praza do próximo curso 2025/26!

INFORMACIÓN ENGLISH CLUB e LE CLUB FRANÇAIS

FORMULARIO DE INSCRIPCIÓN CURSO 2025/26

Curso 2024-2025, Curso Actual, Mediación

XORNADAS DE ACOLLIDA DO NOVO ALUMNADO DE 1º ESO PARA O CURSO 2025-2026

Como xa vén sendo costume no noso instituto dende hai moitos anos, este venres, 30 de maio, levouse a cabo unha xornada de acollida do alumnado de 6º EP do noso centro adscrito, o CEIP Ramón-María del Valle-Inclán, co obxectivo de facilitar o tránsito de Primaria a Secundaria e de que o futuro alumnado de 1º ESO no curso que vén coñeza o centro. Esta xornada foi organizada polo Equipo de Medición do centro de maneira que o alumnado mediador guiou a visita do novo alumnado repartido en grupos  mostrando tódalas estancias e posibilidades do noso instituto.
Esta iniciativa completarase o luns, 2 de xuño, cunha reunión dirixida ás familias deste alumnado e que terá lugar ás 18:00 h. no Salón de actos do centro coa intención de dar a coñecer o funcionamento e características do instituto e resolver as eventuais dúbidas que puideran xurdir ante a nova etapa educativa que comezará a rapazada que empeza a Secundaria o curso que vén.
Alumnado, Bolsas e axudas, Curso 2024-2025, Curso Actual, Secretaría

AXUDAS PARA A ADQUISICIÓN DE MATERIAL ESCOLAR NO CURSO 2025/26

Do 16 de maio ao 20 de xuño está aberto o prazo para solicitar as axudas para a adquisición de material escolar para o curso 2025-2026. Ditas axudas concédense ao abeiro da Orde do 28 de abril de 2025 pola que se regula a participación no fondo solidario de libros de texto e se convocan axudas para adquirir libros de texto e material escolar destinadas ao alumnado matriculado en educación primaria, educación secundaria obrigatoria e educación especial en centros docentes sostido con fondos públicos para o curso escolar 2025/26 (https://www.xunta.gal/dog/Publicados/2025/20250515/AnuncioG0761-290425-0001_gl.html).
No caso do noso instituto, ao ser un centro E-Dixgal, unicamente se poden solicitar as axudas para material escolar.
A solicitude das axudas farase preferiblemente por vía electrónica no formulario normalizado (Código de procedemento ED330B) dispoñible na aplicación Fondolibros (https://www.edu.xunta.gal/fondolibros/) a través da sede electrónica da Xunta de Galicia. Opcionalmente poderá facerse de xeito presencial no centro docente ou en calquera dos lugares e rexistros establecidos na normativa reguladora do procedemento administrativo común.
Actividades, Biblioteca, Curso 2024-2025, Curso Actual

1º ESO xoga na celebración das Letras Galegas

Este ano, para conmemorar o Día das Letras Galegas, no noso instituto organizáronse diversas actividades para o alumnado, entre elas un divertido xogo para os estudantes de 1º de ESO.
O reto consistía en atopar a 7 escritoras galegas que estaban “escondidas” en distintos puntos do centro. Cada unha delas tiña un cartel con información sobre o seu nome e o título dunha das súas obras máis relevantes. O alumnado debía buscar a todas, anotar correctamente os títulos e entregalos para participar no concurso.
O primeiro estudante que conseguiu atopar e recoñecer todas as escritoras levou un premio especial como recoñecemento ao seu esforzo e coñecemento.
Esta actividade foi unha forma divertida e interactiva de achegar o alumnado á literatura galega e valorar o traballo das nosas autoras, dentro dunha programación máis ampla de celebración do Día das Letras.
Parabéns a todos os participantes e, especialmente, aos gañadores: Mario, Aroa e Bruno!
Seguiremos promovendo o amor pola lingua e cultura galega desde o centro.
Actividades, Curso 2024-2025, Curso Actual, Departamento de Lingua Galega

Visita de María Reimóndez

O pase de diapositivas require JavaScript.

O libro de lectura, Furia encantounos e estabamos a desexar que a autora viñese ao centro para poder preguntarlle moitas curiosidades. Este martes puidemos coñecela e levamos unha gran sorpresa! O alumnado de terceiro argallara unha presentación con María Reimóndez e incluso unha mostra, en vivo e en directo, da novela!
O encontro coa autora foi moi divertido e aprendemos moitas cousas que levamos con nós ben aconchegadas como a empatía, poñernos na pel da outra persoa ou a importancia de encontrar o deporte que nos faga sentir máis felices como lle aconteceu a Cecilia co boxeo.
Ademais, asinounos os libros e puidemos levar un recordo moi especial.

Actividades, Curso 2024-2025, Curso Actual, Departamento de Lingua Galega, Equipo de Dinamización da Lingua Galega

Letras Galegas 2025 coa A.F. Aturuxo

O pase de diapositivas require JavaScript.

O día 15 comezou a celebración das Letras Galegas no IES Neira Vilas. E non podía haber mellor maneira de empezar que saíndo ao torreiro coa Agrupación Folklórica Aturuxo!

Os grupos de terceiro da ESO asistiron, na Fábrica, a unha xornada ben especial con aquelas persoas que forman parte de Aturuxo. Desde a emoción de quen acompañou as Pandereteiras de Mens polo mundo e desde o espazo do querer pola nosa tradición oral de cantadoras e tocadoras, coñecemos un chisquiño máis a historia das mulleres que nos transmitiron un tesouro. Pero non só! Tamén puxemos en práctica o aprendido e subimos ao palco para sacar punto e ata houbo quen se animou a facer soar as ferreñas!

Grazas ben sentidas por esta oportunidade de gozar cos maneos e as muiñeiras, A.F. Aturuxo! Foi unha xornada chea de ledicia e emoción!