A información sobre a biblioteca dispoñible na páxina web do instituto vén de ser renovada e actualizada polo seu equipo. Desde esta semana poden consultarse nela as normas de uso da biblioteca e información detallada sobre a súa historia, os servizos que presta,os fondos que posúe, o enlace ao catálogo en liña e as numerosas actividades que desenvolve.
O pasado 16 de marzo a biblioteca do Instituto recibiu unha cuantiosa doazón de libros en francés, que se unen á sección nesta lingua, tan importante no centro. Os exemplares eran propiedade de Argentina Rivadulla Bao, coruñesa de nacemento, que viviu a maior parte da súa vida entre Francia e Dubai e que nos últimos anos foi veciña de Perillo. O seu gusto pola lectura levouna a posuír unha gran colección de libros en francés, cuxo destino debía ser, segundo a súa vontade, seguir alimentando a cultura, a imaxinación e a formación de novos lectores tras o seu pasamento, producido en abril de 2022. Cumprindo a promesa que lle fixeran, os seus herdeiros entregaron á biblioteca todos estes volumes, que se conservarán e disfrutarán en lembranza desta xenerosa veciña e da súa familia. Merci beaucoup!
Os días 27, 29 e 30 de marzo o alumnado de 2º ESO disfrutou dunha saída promovida polo Departamento de Xeografía e Historia e organizada polo Concello de Oleiros en colaboración coa CEM. Desta volta tiveron a oportunidade de coñecer as Fragas do Eume a través dunha andaina pola súa natureza e o seu patrimonio, así como a vila de Pontedeume. Moitas grazas a todos/as pola vosa participación e interese!
O alumnado de de 1º de ESO C e 3º ESO C participaron no Obradoiro Ars Scribendi impartido por David Amboage empregando cálamo e papiros para practicar este arte.
Os días 21 e 22 de marzo o alumnado de 3º ESO visitou Santiago de Compostela no marco do programa “Un día en Galicia” do Concello de Oleiros. A actividade, promovida polo Departamento de Xeografía e Historia, contou coa guía de Marta e Ana e permitiu ao alumnado coñecer un pouco mellor a cidade compostelá, desde algunhas das súas zonas verdes e parques ata o casco vello, a catedral ou o Museo do Pobo Galego.
Os días 14, 15 e 16 de marzo o alumnado de 1º ESO disfrutou dunha xornada de descubrimento e aprendizaxe no Castro de Viladonga e na cidade vella de Lugo grazas ao programa “Un día en Galicia” do Concello de Oleiros. A actividade, promovida polo Departamento de Xeografía e Historia, contou coa marabillosa labor de Marta, Ana e Fran, os/as monitores/as que sempre nos guían nestas saídas. Moitas grazas a elas e tamén ao Museo do Castro de Viladonga, polo seu caloroso recibimento!
Este curso 2022-2023 a biblioteca do IES Neira Vilas habilitou no andar baixo do instituto un punto de intercambio de libros. Nel pódese coller libremente o volume que se queira ler; a cambio só hai que deixar outro libro que xa se lera ou que se teña pola casa e non se utilice. O obxectivo é compartir as lecturas das que se disfrutou e descubrir outras novas.
A nosa biblioteca celebrou o Día da muller e da nena na ciencia o 11 de febreiro plantexándolle un reto ao alumnado. Tratábase de identificar diversos inventos e descubrimentos realizados por mulleres científicas ao longo da historia. A actividade completouse co mural no que se expuxeron esas aportacións ao longo de toda a semana e cunha exposición de libros STEM escritos por mulleres científicas. Seguimos traballando e avanzando cara á plena igualdade en todos os campos de coñecemento e en todos os ámbitos da vida.
