Arquivo da categoría: Departamentos

Curso Internacional en Prácticas Restaurativas

10 Maio, 2016 direccion Deixa un comentario

Os pasados 6 e 7 de maio de 2016 celebrouse no noso IESP o Segundo Obradoiro de Prácticas Restaurativas no entorno escolar. Foi ponente do mesmo Jean Schmitz, formador do International Institute for Restorative Practices. Asistiron un total de 17 participantes que puideron actualizar a súa formación nesta interesante metodoloxía ou mesmo acercarse por primeira vez a ela.
O obradoiro tivo un enfoque eminentemente práctico cara a que os asistentes puideran adestrarse na aplicación de diferentes técnicas restaurativas.
As Prácticas Restaurativas proporcionan un enfoque novo e diferente das estratexias para abordar a conflitividade e a disciplina escolar. Mesmo proporciona ferramentas para crear comunidade no centro educativo, mellorando as relacións persoais e o sentimento de pertenza ao grupo e tamén teñen un alto valor como metodoloxía pedagóxica no traballo de aula.

Prácticas Restaurativas

Departamento de Matemáticas

Olimpíada de Matemáticas

10 Maio, 2016 vicedireccion Deixa un comentario

O pasado xoves 21 de abril tivo lugar a fase de zona da Olimpíada de Matemáticas de 2º da ESO. Este ano o noso centro estivo representado polas alumnas Noemí Muíños Blanco e Hellen Diel Veras e os alumnos Lucas Canle de Andrés e Jacobo Pita-Baamonde Vázquez. Os resultados desta proba serán publicadas o próximo día 10 de maio na páxina web de AGAPEMA. Dende o centro queremos agradecer a todo o alumnado que se animou a participar nesta andaina pola matemática así como desexarlle moita sorte ós nosos representantes.

Departamento de Francés

Viaxe Europea 2016

8 Maio, 2016 direccion Deixa un comentario

Máis de 50 alumnas e alunmos da Sección Plurilingüe e de BACHIBAC realizarán a xa tradicional “VIAXE EUROPEA” co ánimo de que coñezan cidades e países da U.E. Este curso está programada a visita a Bélxica e coñeceremos a súa capital Bruxelas, sede oficial das institucións europeas; estarán acompañados de 4 profesores do centro e da Asistente de Linguas Ivana Mickovski . As datas da viaxe son do 13 ao 17 de maio.

Visitarán en Bruxelas o Brupark onde se situa o Atomium construído en 1958 con motivo da Exposición Universal , despois visitarán a Mini-Europe ( visita a través de maquetas dos monumentos máis representativos das diferentes cidades e lugares de Europa), e pola tarde diversión no parque acuático “Océade”. Tamén se fará unha visita ás institucións europeas onde un grupo de alumnos participará nun Xogo de Rol relacionado con temas europeos e outro grupo visitará o Parlementarium.
Outro día farán tamén unha visita á cidade de Bruxas, a “Venecia do norte “ e en barco percorrerán a cidade polos seus canais.

Departamento de Francés

VIIIº Intercambio Escolar // Chegada a Oleiros do Alumnado Francés.

22 Abril, 2016 vicedireccion Deixa un comentario

O pasado mércores dia 20 de abril chegaron a Oleiros 27 alumnas e alumnos do colexio COLLÈGE NOTREDAME LE MENIMUR DE VANNES.
Están acompañados de 2 profesoras, unha delas xa moi coñecida entre nos a profesora Catherine Le Blay. Coma sempre teñen unha axenda moi apretada e aproveitarán para visitar A Coruña, Santiago de Compostela, as Rias Baixas e para acercarse a Portugal; teremos o sábado 23 de maio a tradicional “Cea da Amizade “ no Centro Cívico de Santalla – Santa Cruz que o Concello de Oleiros nos cede habitualmente. O regreso a Francia está previsto para o día 30 deste mes de abril .
Desexámoslles unha boa estadía e que disfruten da nosa terra.

Actividades, Departamento de Lingua Galega, Excursións, Vicedirección

A TERRA CHÁ, DA MAN DE MANUEL MARÍA

29 Marzo, 2016 vicedireccion Deixa un comentario

TerraCha01

Os grupos de 2º de ESO viviron os días 3 e 4 de marzo unha xornada pola Terra Chá dentro do programa Un día en Galicia do Servizo Municipal de Educación do Concello de Oleiros.

A actividade incluía a visita á Casa Museo de Manuel María en Outeiro de Rei, unha pequena ruta pola Reserva da Biosfera Terras do Miño, un itinerario ornitolóxico pola lagoa de Cospeito e un achegamento ao Miradoiro de Penas de Rodas. Este programa inicial tivo que adaptarse ás adversas condicións metereolóxica, algo de chuvia no primeiro día e continua o segundo, e por iso o día 3 non se fixo o itinerario ornitolóxico e o día 4 non foi posible acometer a ruta pola Reserva da Biosfera que foi substituida por unha visita a oleiría de Bonxe.

As xornadas realizáronse a iniciativa dos Departamentos de Bioloxía e Galego co obxectivo de aproximar ao alumnado a un espazo de gran valor ambiental, paisaxístico, artístico e etnográfico á vez que se achegaba á figura de Manuel María, poeta que protagoniza a celebración das Letras Galegas deste ano.

O alumnado participante na actividade nos dous días estivo fortemente implicado nas distintos contidos, seguindo con sumo interés todas as explicacións que se lles daba e realizando os traballos de observación prantexados polo que, ao remate da actividade, foron felicitados polo profesorado acompañante que tamén agradeceu a colaboración do persoal da Casa Museo de Manuel María e a dos dous técnicos en educación ambiental do colectivo CEM que presta servizo para a Concellería de Ensino e Xuventude de Oleiros.

Casa Manuel María

Río Miño

Carballeria Sta Susana

Bonxe

Lagoa de Cospeito

Penas de Rodas

Actividades, Departamento de Xeografía e Historia

Visita a Santiago de Compostela

12 Marzo, 2016 direccion Deixa un comentario

Visita a Santiago Alumnado de Historia da Arte — Visita a Santiago
Alumnado de Historia da Arte

O 10 de marzo, o alumnado de Historia da Arte realizou unha saída a Santiago de Compostela onde visitaron á Catedral, incluíndo os tellados, e viron outros edificios significativos que permiten repasar fundamentalmente o estudado da arte románica e barroca. A xornada foi de día completo co transporte en tren.

Visita a Santiago Alumnado de Historia da Arte

Actividades, Departamento de Francés

VIII Échange Scolaire // Intercambio Escolar

11 Marzo, 2016 vicedireccion Deixa un comentario

Un total de 43 alumnos de 2º, 3º, 4º ESO e 1º de Bacharelato participan no VIII ÉCHANGE SCOLAIRE que terá lugar entre os días 8 e 19 de abril. Estarán acompañados dos profesores Dona Isabel López Mariño , Don Juan Santamaría e Don Carlos Vidal .
Durante a estadía en Vannes (Francia), o alumnado do Neira Vilas fará diversas actividades : visita á rexión da Bretaña francesa ( Carnac, Quiberon , Mont Saint Michel, Saint Malo, etc.); tamén asistirán ás clases no Collège Notre Dame Le Menimur.
O alumnado BACHIBAC fará unha inmersión lingüística reforzada para a preparación da proba externa que realizarán estes alumnos no mes de maio de 2017. Ademais, para superar o DELF B2, asistirán a clases no Lycée.
A continuación efectuarase unha visita a París onde o alumnado de 4º da ESO e 1º de Bacharelato visitará o Museo do Louvre.
O intercambio rematará cunha visita a Eurodisney.

Actividades, Alumnos, Departamento de Orientación

Visita as facultades da Universidade da Coruña

6 Marzo, 2016 vicedireccion 1 comentario

O 4 de marzo o alumnado de 2º de bacharelato realizou esta visita, organizada polo departamento de Orientación, na que puideron coñecer as instalacións, funcionamento e contidos que se imparten en diversas facultades seguindo tres itinerarios distintos en función das preferencias do alumnado. Agradecer á Universidade a organización e atención prestada aos nosos alumnos e alumnas.

Visita Facultades 2º BACH — Foto realizada polo alumno Juan Tejedor de 2º de bacharelato

Departamento de Orientación

Os representantes da CIUG no noso centro

23 Febreiro, 2016 direccion Deixa un comentario

O día 12 de Febreiro, estiveron connosco dous relatores da Ciug ( Comisión Interuniversitaria Galega) para realizar unha xornada de orientación dirixida aos alumnos de 2º de bacharelato.
O contido da exposición estivo centrado nas materias, obxecto de examen das probas PAU así como a cualificación e preinscripción. Tamén nos amosaron datos estadísticos sobre a porcentaxe de alumnos que solicitan a reclamación e segunda corrección. Esta cuestión serviu para clarificarnos que a reclamación é importante cando pode haber algún erro na suma dos apartados dun mesmo exercicio de exame.
A segunda parte gardou relación co acceso á universidade, facendo fincapé no riguroso orde de solicitude de titulacións que se debe de facer no momento de preinscibirse na universidade.

Máis información…

IESP Xosé Neira Vilas