Arquivo da categoría: Curso Actual

Admisión de alumnado, Consello Escolar, Curso 2023-2024, Curso Actual

PUBLICACIÓN DAS LISTAXES PROVISIONAIS DO ALUMNADO ADMITIDO E NON ADMITIDO NA ADMISIÓN ORDINARIA PARA O CURSO 2024-2025

Hoxe, 25 de abril, foron publicadas as listaxes provisionais do alumnado admitido e non admitido na admisión ordinaria para o curso 2024-2025. Ditas listaxes pódense consultar presencialmente no taboleiro de anuncios do centro ou por vía electrónica a través da aplicación informática admisionalumnado.

As familias poderán formular reclamación a ditas listas ante o Consello Escolar no prazo de 5 días hábiles contados a partir do seguinte ao da súa publicación.

A listaxe definitiva do alumnado admitido e non admitido publicarase o día 15 de maio.

Alumnado, Curso 2023-2024, Curso Actual, Excursións

EXCURSIÓN DO ALUMNADO DE 1º ESO AO COUREL

Entre os días 10 e 12 de abril e 17 e 19 do mesmo mes, a meirande parte do noso alumnado de 1º ESO viaxou ao Courel grazas á actividade organizada e ofertada aos centros educativos, como en cursos anteriores, polo Concello de Oleiros. Ao longo dos tres días que durou a estadía de cada grupo, o noso alumnado, acompañado de profesorado do instituto, realizou diversas actividades físicas e culturais que lle permitiron coñecer de preto a enorme riqueza da gran reserva natural que é o Courel e a súa contorna.

O pase de diapositivas require JavaScript.

Actividades, Curso 2023-2024, Curso Actual, Departamento de Lingua Galega, EDNL

CHARLA SOBRE LUÍSA VILLALTA

O mércores 17 de abril a escritora Marga do Val impartiu unha charla sobre Luísa Villalta ao alumnado de 2º Bacharelato. A actividade, organizada polo Departamento de Lingua Galega e literatura e o Equipo de Dinamización Lingüística do centro, permitiu coñecer mellor á autora á que este ano se lle adica o Día das Letras Galegas. Moitas grazas a Marga do Val por este interesante achegamento a Luísa Villalta.

Actividades, Curso 2023-2024, Curso Actual, Departamento de Lingua Galega, EDNL

FESTIVAL BOCA CHEA

O luns 15 de abril Ángeles Goás, de Abadín (Lugo), achegoulle ao alumnado de 3º ESO aquelas historias de noso que se transmiten oralmente de xeración en xeración. Grazas ao Equipo de Dinamización Lingüística e ao Departamento de Lingua Galega e literatura do noso instituto, así como ao Equipo de Normalización do Concello de Oleiros por facer posible, un ano máis, este festival no noso centro educativo.
Actividades, Anpa, Curso 2023-2024, Curso Actual

CHARLA SOBRE TÉCNICAS DE ESTUDO PARA AS FAMILIAS

O vindeiro luns, 15 de abril, ás 19:00 h. terá lugar no instituto unha charla sobre técnicas de estudo dirixida ás familias do noso alumnado e impartida por Belén Pérez Sanmartín, pedagoga do Gabinete psicopedagóxico Eleeméntal de Perillo. A actividade, organizada e subvencionada pola ANPA Arce do noso centro, ten o obxectivo de informar e dotar ás familias dalgunhas das ferramentas de estudo, organización, planificación do traballo, concentración, etc. sobre as que versaron os talleres de técnicas de estudo impartidos pola mesma profesional a diversos grupos da ESO ao longo do curso. Deste xeito, preténdese que se poida reforzar o uso de ditas ferramentas na casa e facelas máis efectivas para o beneficio do noso alumnado. Agardámosvos!

Alumnado, Curso 2023-2024, Curso Actual

PROBAS DE ACREDITACIÓN DA COMPETENCIA LINGÜÍSTICA

Nas vindeiras semanas terán lugar as probas de acreditación da competencia lingüística en Francés e Inglés, para as que un número elevado do noso alumnado recibiu as axudas concedidas pola Consellería.
O alumnado interesado xa foi informado en detalle das datas, horas e lugares de celebración, así como das características das probas respectivas e da documentación que teñen que levar para presentarse a elas. Pero a través desta nova preténdese transmitir ao conxunto da comunidade educativa a información básica:
– Probas de Inglés (Niveis B1, B2 e C1): Terán lugar os días 16 e 17 de abril a partir das 15:50 h. (agás o alumnado que se presenta ao nivel C1, que fará unha parte da proba o día 16 pola mañá). Realizaranse no noso instituto.
– Probas de Francés (Delf Scolaire, Niveis B1 e B2):
O exame oral terá lugar o venres, 19 de abril, pola mañá no noso centro.

Seguir lendo PROBAS DE ACREDITACIÓN DA COMPETENCIA LINGÜÍSTICA →

Actividades, Alumnado, Anpa, Curso 2023-2024, Curso Actual, Departamento de Educación Física

Actividades co alumnado

Nestes días realizáronse  diversas actividades con alumnado do Neira.

Sesións de defensa persoal impartidas ao alumnado de 4º ESO e 1º de BACH, organizadas pola ANPA en colaboración co Departamento de EF do noso centro. Esta foi a primeira sesión das tres das que consta o breve cursiño introdutorio que imparten a xente da Asociación Galega de Bujutsu Sosei.

Encontro coa escritora Antía Yáñez no auditorio da Fábrica, quen lles falou este martes ao alumnado de 3º ESO da súa obra Non penses nun elefante rosa e doutros títulos da súa produción.

Sesións enmarcadas no Programa para o fomento da lectura que ofrece a Biblioteca de Rialeda, a onde acudiu o noso alumnado de 2º ESO para escoitar a Charo Pita contando varios dos relatos mitolóxicos incluídos nas Metamorfoses, de Ovidio.

Actividades, Curso 2023-2024, Curso Actual, Departamento de Lingua Galega

DE LUÍSA VILLALTA A ANTÍA OTERO

Da man da poeta Antía Otero chegou, no Día da Poesía (21 de marzo), a autora homenaxeada nas Letras Galegas 2024, Luísa Villalta, ás aulas de primeiro de Bacharelato en colaboración co Servizo de Normalización Lingüística do Concello de Oleiros, de Apiario e dos departamentos de Dinamización Lingüística e de Lingua Galega e Literatura do noso centro.

Na primeira parte da sesión, A. Otero achegounos non só á poesía de Luísa Villalta senón, tamén, ao sentir poético e animounos, na segunda parte, a construír o noso propio texto. Escoitamos música, lemos poemas, achegámonos un chisquiño máis ao pensamento literario de Luísa Villalta e, incluso, percorremos coas poetas o camiño da creación. E, sobre todo, celebramos por todo o alto o Día da Poesía!

Curso 2023-2024, Curso Actual, Departamento de Lingua Galega, Equipo de Dinamización da Lingua Galega

FALANDO CON ZENZAR: MÚSICA E LINGUA

O martes 19 de marzo o alumnado de 3º e 4º da ESO gozou dunha mañá moi especial, na Fábrica de Perillo, en que a música, a lingua, a ilustración e as ganas de pasalo ben fixeron que quedasemos con ganas de máis! Grazas ao Servizo de Normalización Lingüística do Concello de Oleiros e en colaboración co Equipo de Dinamización Lingüística e co Departamento de Lingua Galega e Literatura do noso instituto, puidemos coñecer o proxecto Músicas Ilustradas de Laura Romero, reflexionamos sobre o papel das mulleres na música galega e, tamén, sobre a importancia da nosa lingua como elemento dinamizador e imprescindible nunha cultura.
Nestoutro proxecto en que participamos, #aquitamensefala, hai algunhas cancións de Zenzar. Animámosvos a escoitalas porque seguro que vos gustan tanto como a nós!