O 6 de febreiro toda a comunidade do Neira Vilas despediu con moita emoción á profesora de inglés Manuela Balsa Lombardía, gran profesional e gran compañeira que comezou unha nova andaina tras a súa xubilación. Desde o centro queremos agradecerlle o seu valioso labor docente e desexarlle toda a felicidade nesta nova etapa que comeza. Moitas grazas, Manu!
Arquivo da categoría: Curso 2023-2024
Visita ao campus universitario de santiago
O alumnado de 2º de Bacharelato do noso centro visitou ás facultades do campus universitario de Santiago de Compostela, dentro do Programa A Ponte que organiza a USC.
Un total de 39 alumnos fixeron diferentes percorridos polas facultades que máis lles interesaba visitar e tiveron oportunidade de sentirse verdadeiros universitarios e universitarias dende, por exemplo, o estudio de gravación da Facultade de Ciencias da Comunicación, como se ve na foto.
Campaña de Dinamización lingüística
A mocidade do IES Plurilingüe Xosé Neira Vilas participa na iniciativa cultural e de dinamización lingüística Aquí tamén se fala xunto con máis de 180 centros educativos de toda Galiza!
O noso Concello naceu pola volta de voces como Xosé Neira Vilas, Nacho Taibo, María Miramontes, Francisco Pillado ou, entre outras moitas, Luísa Villalta. Xente nacida aquí ou chegada de outras partes que axuntan no labor de construír un Oleiros cheo de orgullo da nosa terriña e da nosa lingua! Por iso, o alumnado de terceiro da ESO animou as veciñas e veciños a participar, man a man, nesta proposta.
Moitísimas grazas aos máis de cincuenta comercios de Perillo e Montrove que nos acollestes con tanta amabilidade!
Estas son algunhas das imaxes:
CONFERENCIA DE ÁNGEL CARRACEDO SOBRE MEDICINA LEGAL E XENÉTICA FORENSE
O mércores 24 o alumnado de 1º ESO e 1º e 2º Bacharelato tivo o inmenso pracer de asistir á conferencia impartida polo catedrático de Medicina legal da Universidade de Santiago de Compostela, Ángel Carracedo, pioneiro e líder mundial en xenética forense e en xenómica comparada e de poboacións. Actualmente dirixe a Fundación Pública Galega de Medicina Xenómica e o Centro Nacional de Genotipado-ISCIII (CEGEN), ademais de coordinar o Grupo de Medicina Xenómica da USC, o Centro de Investigación Biomédica en Rede de Enfermidades Raras (CIBERER) e a área de Xenética e Bioloxía de Sistemas do Instituto de Investigación Sanitaria de Santiago de Compostela (IDIS).
A conferencia achegou os asistentes á Xenética forense e ás súas aplicacións médicas e legais, entre outros moitos aspectos, e plantexou tamén interesantes reflexións sobre a importancia da vocación nos estudos e no traballo e sobre a situación actual e retos futuros das ciencias en xeral e da Medicina en particular. A charla foi seguida dun interesante debate arredor das preguntas plantexadas polo alumnado.
A comunidade educativa do instituto quere agradecer a Ángel Carracedo a súa ponencia maxistral e a súa amabilidade e atención cara ao noso centro.
Téñoa negra! Literatura (e outras artes) contra a marea negra do Prestige.
A actividade desenvolvida polo docente, Isaac Lourido, e promovida polo programa Charlas de Divulgación Científica da UDC, consistiu nunha breve introdución á catástrofe ecolóxica causada polo naufraxio do petroleiro Prestige en novembro de 2003 e unha presentación das accións desenvolvidas no ámbito da literatura, a música e as artes plásticas como resposta social e política naquel contexto de crise. Desenvólveuse como formato de “Obradoiro”, xa que se procura que sexa unha actividade participativa e colaborativa, a partir de materiais audiovisuais, fotografías, cartaces ou antoloxías de poesía, entre outros. Así, o alumnado de 1º de Bacharelato manipulou textos de creación, xornalísticos, etc, e fixo unha reflexión colectiva sobre esta catástrofe. A posta en común dos elementos analizados foi enriquecedora e puxo a mirada nun futuro en que non se repitan estas situacións.
ENCONTRO DO PROXECTA “CORRESPONDENTES XUVENÍS”
O pasado 15 de decembro os Correspondentes Xuvenís do Neira Vilas asistiron ao primeiro encontro con outros Correspondentes da provincia da Coruña. Esta xornada tivo lugar no albergue Marina Española de Sada. O obxectivo da mesma foi coñecer a outros rapaces e rapazas que están facendo o mesmo noutros centros educativos. Ademais tiveron varias formacións sobre oratoria e sobre intelixencia artificial. Por último, tiveron que poñer en práctica o aprendido cun pequeno proxecto que fixeron por grupos, mesturados con persoas doutros institutos.
Actualmente, os participantes neste proxecta, baixo a coordinación da profesora Cristina Vázquez Castro, están creando unha conta de Instagram que utilizarán para publicar e anunciar avisos importantes, de distintos tipos de actividades, proxectos, concursos, etc., á rapazada do instituto.
Intercambio con Burela
Realizouse a primeira parte do Intercambio con Burela que puxo en marcha o Equipo de Dinamización da Lingua Galega en estreita colaboración co Departamento de Lingua Galega e gran apoio da Concellería de Cultura do Concello de Oleiros. Nesta actividade participou o alumnado dos tres 2º ESO do noso centro e máis outros sesenta alumnos dese mesmo curso do IES Perdouro de Burela.
Coñece a contorna de Oleiros: Praia de Barrañán e fraga de Sisalde
O instituto participou en dúas saídas organizadas polo Concello no marco do programa Coñece a contorna de Oleiros: Praia de Barrañán e fraga de Sisalde. O alumnado de 1º ESO A (luns, 15 de xaneiro) e 1º ESO B (martes, 16 de xaneiro) foi o que se sumou nesta ocasión á actividade.
PARTICIPACIÓN NO PROGRAMA EDUEXCHANGES
O noso centro resultou seleccionado para participar no programa EduExchanges de intercambio presencial de alumnado con centros educativos doutros países durante o curso 2023/2024, segundo se recolle na resolución definitiva que se pode consultar no seguinte enlace: https://www.edu.xunta.gal/portal/es/node/40630.
A axuda económica concedida ao abeiro deste programa, enmarcado na Estratexia Galega de linguas estranxeiras Edulingüe 2030, destinarase a financiar o intercambio do alumnado de 1º Bacharelato que cursa o programa Bachibac co lycée Saint François-Xavier de Vannes. Dito intercambio terá lugar do 15 ao 23 de febreiro.
Este xoves, 18 de xaneiro, celebrarase no centro unha reunión coas familias do alumnado implicado para informar de todas as cuestións relativas á organización do intercambio.
CONCESIÓN DE AXUDAS PARA A REALIZACIÓN DE PROBAS DE ACREDITACIÓN DA COMPETENCIA EN LINGUAS ESTRANXEIRAS
A Dirección Xeral de Ordenación e Innovación Educativa vén de publicar a resolución definitiva das axudas a centros públicos dependentes da Consellería de Cultura, Educación, Formación profesional e Universidades para a realización de probas de acreditación da competencia en linguas estranxeiras para o alumnado que curse estudos durante o curso 2023/2024.
O noso instituto resultou beneficiario dunha achega total de 4.700€ destinados a financiar as probas de acreditación da competencia lingüística en Inglés e Francés por parte de alumnado de 4º ESO e 1º e 2º Bacharelato a razón de 100€ por alumno/a. Seguir lendo CONCESIÓN DE AXUDAS PARA A REALIZACIÓN DE PROBAS DE ACREDITACIÓN DA COMPETENCIA EN LINGUAS ESTRANXEIRAS