O xoves 15 de febreiro o alumnado de Bachibac 1 comezou a súa viaxe de inmersión lingüística no lycée Saint François-Xavier de Vannes, na Bretaña francesa. Alí convivirán cos seus “correspondants” franceses, asistindo a clases no instituto e participando en numerosas actividades e excursións, ata o venres 23. Bon séjour!
O Concello de Oleiros ao abeiro da Convocatoria para a concesión de subvencións para a promoción da cultura e o deporte para o ano 2023 (Decreto da Alcaldía nº2023002343 de 08/05/2023), mediante resolución de decembro de 2023, acordou conceder á ANPA ARCE DO IES XOSÉ NEIRA VILAS a subvención de 7442 euros para as actividades de : técnicas de estudo, English Club, Taller de xestión emocional, iniciación ao comic e manga, defensa persoal, linguaxe de signos e limpeza de praias.
No noso centro demos a benvida ao Entroido por todo o alto o venres 9 de febreiro. A celebración incluíu un obradoiro de elaboración e degustación de filloas e crêpes, unha recreación do tradicional oso de Salcedo, un certame de testamentos de Entroido, os mandamentos do Meco durante toda a semana, diversas actuacións do alumnado e un espectacular baile final do profesorado. Grazas a todos/as pola vosa participación!
O 6 de febreiro toda a comunidade do Neira Vilas despediu con moita emoción á profesora de inglés Manuela Balsa Lombardía, gran profesional e gran compañeira que comezou unha nova andaina tras a súa xubilación. Desde o centro queremos agradecerlle o seu valioso labor docente e desexarlle toda a felicidade nesta nova etapa que comeza. Moitas grazas, Manu!
O alumnado de 2º de Bacharelato do noso centro visitou ás facultades do campus universitario de Santiago de Compostela, dentro do Programa A Ponte que organiza a USC.
Un total de 39 alumnos fixeron diferentes percorridos polas facultades que máis lles interesaba visitar e tiveron oportunidade de sentirse verdadeiros universitarios e universitarias dende, por exemplo, o estudio de gravación da Facultade de Ciencias da Comunicación, como se ve na foto.
A mocidade do IES Plurilingüe Xosé Neira Vilas participa na iniciativa cultural e de dinamización lingüística Aquí tamén se fala xunto con máis de 180 centros educativos de toda Galiza!
O noso Concello naceu pola volta de voces como Xosé Neira Vilas, Nacho Taibo, María Miramontes, Francisco Pillado ou, entre outras moitas, Luísa Villalta. Xente nacida aquí ou chegada de outras partes que axuntan no labor de construír un Oleiros cheo de orgullo da nosa terriña e da nosa lingua! Por iso, o alumnado de terceiro da ESO animou as veciñas e veciños a participar, man a man, nesta proposta.
Moitísimas grazas aos máis de cincuenta comercios de Perillo e Montrove que nos acollestes con tanta amabilidade!
Estas son algunhas das imaxes:
O mércores 24 o alumnado de 1º ESO e 1º e 2º Bacharelato tivo o inmenso pracer de asistir á conferencia impartida polo catedrático de Medicina legal da Universidade de Santiago de Compostela, Ángel Carracedo, pioneiro e líder mundial en xenética forense e en xenómica comparada e de poboacións. Actualmente dirixe a Fundación Pública Galega de Medicina Xenómica e o Centro Nacional de Genotipado-ISCIII (CEGEN), ademais de coordinar o Grupo de Medicina Xenómica da USC, o Centro de Investigación Biomédica en Rede de Enfermidades Raras (CIBERER) e a área de Xenética e Bioloxía de Sistemas do Instituto de Investigación Sanitaria de Santiago de Compostela (IDIS).
A conferencia achegou os asistentes á Xenética forense e ás súas aplicacións médicas e legais, entre outros moitos aspectos, e plantexou tamén interesantes reflexións sobre a importancia da vocación nos estudos e no traballo e sobre a situación actual e retos futuros das ciencias en xeral e da Medicina en particular. A charla foi seguida dun interesante debate arredor das preguntas plantexadas polo alumnado.
A comunidade educativa do instituto quere agradecer a Ángel Carracedo a súa ponencia maxistral e a súa amabilidade e atención cara ao noso centro.
A actividade desenvolvida polo docente, Isaac Lourido, e promovida polo programa Charlas de Divulgación Científica da UDC, consistiu nunha breve introdución á catástrofe ecolóxica causada polo naufraxio do petroleiro Prestige en novembro de 2003 e unha presentación das accións desenvolvidas no ámbito da literatura, a música e as artes plásticas como resposta social e política naquel contexto de crise. Desenvólveuse como formato de “Obradoiro”, xa que se procura que sexa unha actividade participativa e colaborativa, a partir de materiais audiovisuais, fotografías, cartaces ou antoloxías de poesía, entre outros. Así, o alumnado de 1º de Bacharelato manipulou textos de creación, xornalísticos, etc, e fixo unha reflexión colectiva sobre esta catástrofe. A posta en común dos elementos analizados foi enriquecedora e puxo a mirada nun futuro en que non se repitan estas situacións.
O pasado 15 de decembro os Correspondentes Xuvenís do Neira Vilas asistiron ao primeiro encontro con outros Correspondentes da provincia da Coruña. Esta xornada tivo lugar no albergue Marina Española de Sada. O obxectivo da mesma foi coñecer a outros rapaces e rapazas que están facendo o mesmo noutros centros educativos. Ademais tiveron varias formacións sobre oratoria e sobre intelixencia artificial. Por último, tiveron que poñer en práctica o aprendido cun pequeno proxecto que fixeron por grupos, mesturados con persoas doutros institutos.
Actualmente, os participantes neste proxecta, baixo a coordinación da profesora Cristina Vázquez Castro, están creando unha conta de Instagram que utilizarán para publicar e anunciar avisos importantes, de distintos tipos de actividades, proxectos, concursos, etc., á rapazada do instituto.